ގަވައިދުން ކަސްރަތު ކުރުމަކީ ކޮންމެހެންވެސް ކުރަން ޖެހޭކަމެއްކަން އަހަރުމެން އެންމެންވެސް ދަންނަމުއެވެ. ސަބަބަކީ ހަށިގަނޑުގެ ދުޅަހެޔޮކަން ދެމެހެއްޓުމަށާއި ގިނަ ބަލިތަކަކުން ރައްކާތެރި ކޮށްދިނުމަށް ކަސްރަތު އެހީވެދޭތީއެވެ. ނަމަވެސް ދެ ޖިންސުގެ ދެމެދުގައި ކަސްރަތު ކުރުމުގައި ގެންގުޅެންޖެހޭ މިންވަރު ތަފާތެވެ.
މީގެ ސަބަބުން ދެފަރާތުގެ ހިތުގެ މަސްތަކަށް ރަނގަޅު އަސަރުތަކެއް ކުރާކަން ދިރާސާތަކުން ދައްކައެވެ. ޖޭއޭސީސީގައި އޮތް 400،000 މީހުންނާއެކު ކުރެވުނު ދިރާސާއަކުން ދައްކާގޮތުގައި ފިރިހެނުންނަށް ވުރެ މަދުން ކަސްރަތު ކުރެވޭ އަންހެނުންގެ ހިތުގެ ސިއްޙަތު ރަނގަޅުވެފައިވެއެވެ. މި ދިރާސާއިން ދެއްކި ގޮތުގައި ސިއްޙަތު ރަނގަޅު ހިތެއް ލިބުމަށްޓަކައި މަދުން ކަސްރަތު ކޮށްގެންވެސް އަންހެނުންނަށް އެކަން ހާސިލް ކުރެވިދާނެއެވެ. މި ދިރާސާގައި ހަފްތާއަކު 300 މިނަޓުވަންދެން ކަސްރަތު ކުރެވުނު މީހުންގެ ތެރެއިން އަންހެނުން ވަނީ %24 ހިތުގެ ސިއްޙަތު ވަރުގަދަ ކުރެވިފައެވެ. ފިރިހެނުން މި އަދަދަށް ކަސްރަތު ކުރުމުން ހަމައެކަނި %15 އަށް ހިތުގެ ސިއްޙަތު ވަރުގަދަ ކުރެވުނެވެ. މި ދިރާސާއިން ދެއްކި ގޮތުގައި ހެލިފެލިވެ ބާރު ބޭނުން ކުރާ ކަސްރަތުތައް ކޮށްގެން ހިތުގެ ބުންވަރު ރަނގަޅުކުރަން އަންހެނުން ބޭނުންވަނީ ހަފްތާއަކު އެންމެ 2.5 ގަޑިއިރުގެ ކަސްރަތެވެ. ނަމަވެސް ފިރިހެނުން ހަފްތާއަކު 5 ގަޑިއިރު ކަސްރަތުކޮށްގެން ނޫނީ މި ޓާގެޓް ހާސިލްނުވެއެވެ.
މި ހޯދުންތަކަށް ދިރާސާ ކުރާފަރާތްތަކުން އެކި ސަބަބުތައް ބަޔާންކޮށްދެއެވެ. އެވަރެޖްކޮށް ފިރިހެނުންނަކީ ވަރުގަދަ އަދި ބޮޑެތިކޮށް ތިބޭ ބައެކެވެ. ވުމާއެކު އަންހެނުންނެކޭ އެއްފަދައިން ނަތީޖާ ހޯދަން 2 ގުނަ އިތުރަށް މަސައްކަތް ކުރަން ޖެހެއެވެ. ފިރިހެނުންގެ ހިތް ސައިޒުގެ ގޮތުން ބޮޑުވެފައި ފުއްޕާމޭގެ ވައިހޮޅިތަށް ބޮޑެވެ. މީގެ އިތުރުން ފިރިހެނުންގެ މަސްތަށް ބޮޑުވެފައި އަންހެނުންނަށް ވުރެ %38 މަސަލް މާސްގިނައެވެ.
ކަސްރަތަކީ ހަމައެކަނި އިންސާނާގެ ހިތަށް ފައިދާ ކުރާކަމެއް ނޫނެވެ. އެއީ ހަށިގަނޑުގެ ހުރިހާ ބައިތަކަކަށްވެސް ހެޔޮ ބަދަލް ތަކެއް ގެނުވާ ކަމެކެވެ. އެހެންކަމުން މި ދިރާސާއިން އަންހެނުން މަދުން ކަސްރަތު ކުރުމަށް ދެއްކުމުން ކަސްރަތު ކުރުން ދޫނުކޮށް ގަވައިދުން ކަސްރަތުކުރުން މުހިއްމެވެ.
