މާލެއާއި ރަށްރަށުގެ ހައުސިން ޔުނިޓުތަކުގެ މަހު ކުލި 20 އިންސައްތަ މާފުކޮށްދިނުމުން ވެސް ކުލި ނުދައްކާ ގިނަ ބަޔަކު އުޅޭކަމަށް ގެދޮރުވެރިކަމާއި ބިމާއި، އުމްރާނީ ތަރައްގީއާބެހޭ ވުޒާރާއިން ހާމަކޮށްފިއެވެ.
އެ ވުޒާރާއިން މި ކަން ހާމަކުރީ ރޭ ނެރުނު ބަޔާނެއްގައެވެ. އެ ބަޔާނުގައި ބުނެފައިވާ ގޮތުގައި މި އަހަރުގެ ޖަނަވަރީ މަހުން ފެށިގެން ފައިސާ ދެއްކުމަށް ޔުނިޓުތަކުގެ ވެރިފަރާތްތަކަށް އަންގާފައިވާނީ އީއެމްއައިއިން 20 އިންސައްތަ މާފުކޮށްދިނުމަށް ފަހުއެވެ. ނަމަވެސް ގިނަ ފަރާތްތަކުން އަދިވެސް ފައިސާ ނުދައްކާކަމަށް އެ ވުޒާރާއިން ބުނެފައިވެއެވެ. އެހެންކަމުން މަހުންމަހަށް ދައްކަންޖެހޭ ފައިސާ ގަވާއިދުން ދެއްކުމަށް އެ ވުޒާރާއިން ވަނީ އިލްތިމާސްކޮށްފައެވެ.
އެ ވުޒާރާއިން ހާމަކުރި ގޮތުގައި ފްލެޓްތަކުގެ ވެރިފަރާތްތަކުން ފްލެޓްތައް ބޭނުންކުރަމުންދާ ގޮތް އެ ވުޒާރާއިން ދަނީ ގާތުން ބަލަމުންނެވެ. އަދި ގަވާއިދާ ޚިލާފަށް އަމަލު ކުރަމުންދާ ފަރާތްތަކާމެދު އެއްބަސްވުމާ އެއްގޮތަށް ފިޔަވަޅު އަޅާނެކަމަށް އެ ބަޔާނުގައި ބުނެފައިވެއެވެ.
ގެދޮރުވެރިކަމާއި ބިމާއި، އުމްރާނީ ތަރައްގީއާބެހޭ ވުޒާރާއިން ފިޔަވަޅުއަޅާނެ ކަންކަން:
- ގަވާއިދުން ފައިސާ ދައްކަމުން ނުދިއުން
- ކަނޑައެޅިފައިވާ ބޭނުން ނޫން އެހެން ބޭނުންތަކަށް ޔުނިޓު ބޭނުން ކުރުން
- ގަވާއިދާ ހިލާފަށް ތަނަށް ބަދަލުގެނައުން
- ތަން ކުއްޔަށް ދިނުން
ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކުގެ ތެރެއިން ދޫކުރާ ހައުސިންގް ޔުނިޓުތަކަށް ގަވާއިދުން ފައިސާ ނުދައްކާ މައްސަލައަކީ އަބަދުވެސް ފާހަގަކުރެވެމުންދާ މައްސަލައެކެވެ.
މާލެއާއި ރަށްރަށުގައި ތަރައްޤީކޮށްފައިވާ ހައުސިން ޔުނިޓުތަކުގެ ކުލި ކުޑަކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ.
