މޯލްޑިވްސް ގޭސް ޕްރައިވެޓް ލިމިޓެޑުގެ ކުރީގެ މެނޭޖީންގ ޑިރެކްޓަރ ޢަބްދުﷲ މައުމޫންގެ ޕާސްޕޯޓް ހިފަހަށްޓައިފިއެވެ.
އެގޮތުން ފުލުހުން ވިދާޅުވީ، މައުމޫންގެ މައްޗަށް ކުރެވޭ މަލީ ލޯންޑަރ ކުރުމާއި ކޮރަޕްޝަންގެ މައްސަލައެއް އޭސީސީން ބަލާފައި ޕީޖީއަށް ފޮނުވި ކަމަށާއި އެ މައްސަލައިގައި މަނީ ލޯންޑަރިންގެ ބައި ތަހުގީގު ކުރުމަށް ފުލުހުންގެ އިދާރާގައި އެދިފައިވާކަމަށެވެ.
އަދި މައުމޫން މާލެ އައިސްފައި ވާތީ ފުރުން މަނާކޮށް އެ މައްސަލަ ބަލަމުންދާކަން މިހާރު އޭނާއަށް އަންގައިފައިވާނެ ކަމަށްވެސް ފުލުހުން ވިދާޅުވެއެވެ.
ފަހަގަކޮށްލެވޭ ގޮތުގައި މައުމޫން އެނބުރި މާލެ އައިސްފައި މިވަނީ 5 އަހަރު ފަހުންނެވެ.
އޭނާ ގެނައުމުގެ މަސައްކަތް އިންޓަޕޯލް މެދުވެރިވެގެންވެސް މީގެ ކުރިން ފަށައިފައިވެއެވެ.
ޕީޖީ އޮފީހުން މައުމޫންގެ މައްޗަށް ވަނީ ހަތް ދައުވާއެއް އުފުލައިފައިވާއިރު، މައުމޫންއަށާއި، މައުމޫންގެ ޢާއިލީ ބައެއް ފަރާތްތަކަށް އަދި އޭނާގެ ގުޅުން އޮންނަކަމަށް ތުޙުމަތުކުރެވޭ ބައެއް ކުންފުނިތަކަށް މޯލްޑިވް ގޭސްގެ ސަޕްލަޔަރެއް ކަމަށްވާ ތްރީ.ޑީ.އެޗް އިންޓަރނޭޝަނަލްއިން ފައިސާ ފޮނުވާފައިވާ ކަމަށް ތުޙުމަތުކުރެވޭ މައްސަލައިގައި 3 ދަޢުވާއެއް ކުރުމަށް 18 އެޕްރީލް 2024 ދުވަހު ކްރިމިނަލް ކޯޓަށް ވަނީ ހުށަހަޅާފައެވެ.
މި ދައުވާތަކަކީ މައުމޫން، 10 ޑިސެންބަރު 2013 ދުވަހުން ފެށިގެން 16 ނޮވެންބަރު 2018 ދުވަހާ ހަމައަށް މޯލްޑިވް ގޭސްގެ މެނޭޖިންގ ޑިރެކްޓަރުގެ މަޤާމުގައި ހުރެގެން ރިޝްވަތު ހިފުމުގެ ކުށުގެ ދައުވާގެ ގޮތުގައި އުފުލާފައިވާ ދައުވާތަކެކެވެ. މިގޮތުން، އޭނާގެ މައްޗަށް ދައުވާ ކުރާ 7 މައްސަލައިގައި ޖުމުލަ، 298،403.5 އެމެރިކާ ޑޮލަރު އޭނާ ރިޝްވަތުގެ ގޮތުގައި ހޯދާފައިވާ ކަމަށް ޕީޖީން ވަނީ ފާހަގަކުރައްވާފައެވެ.
