ދިރިއުޅުމަށް އެކަށީގެން ނުވާ ވަރަށް ވީނާނަވެފައިވާ ގެއެއްގައި ކާބޯތަކެތި އުފައްދަމުން ދިޔަ ބިދޭސީންތަކެއް ހަޔަރުކޮށްފިއެވެ.
އިމިގްރޭޝަނުން ދިރިއުޅުމަށް އެކަށީގެން ނުވާ ވަރަށް ވީނާނަވެފައިވާ ގެއެއްގެ ތެރޭގައި ވިޔަފާރިއަށް އެކި ކަހަލަ ކާބޯތަކެތި ތައްޔާރު ކުރަމުންދާކަމަށް ލިބުނު ރިޕޯޓަކާއި ގުޅިގެން މިއަދު ހެނދުނު އެ ގެ ބަލައި ފާސްކޮށްފައިވާކަމަށެވެ.
އަދި މި އޮޕަރޭޝަންގެ ތެރެއިން އެތަނުގައި ޤަވާއިދާއި ޚިލާފަށް މަސައްކަތް ކުރަމުން ގެންދިޔަ 3 ބިދޭސީއެއް އިމިގްރޭޝަންގެ ބެލުމުގެ ދަށަށް ގެންދެވިފައިވާކަމަށް އެ ފަރާތުން ވަނީ ވިދާޅުވެފައެވެ.
ޤަވާއިދާއި ޚިލާފަށް ރާއްޖޭގައި ހަރަކާތްތެރިވާ ބިދޭސީންގެ މައްސަލަ ހައްލުކުރުމުގެ ގޮތުން އިމިގްރޭޝަނާއި ފުލުހުންނާ ގުޅިގެން ގަވާއިދާ ޚިލާފަށް ރާއްޖޭގައި އުޅޭ ބިދޭސީން ހިންގާ ވިޔަފާރިތައް ހުއްޓުވުމަށް މާލެ ސަރަހައްދުގައި އަންނަނީ އޮޕަރޭޝަންތަކެއް ހިންގަމުންނެވެ.
އިމިގްރޭޝަނާއި ފުލުހުން ގުޅިގެން ކުރިޔަށް ގެންދާ މި އޮޕަރޭޝަންތަކުގައި މިހާތަނަށް 200އަށްވުރެ ގިނަ ތަންތަން ވަނީ ބަލާފާސްކޮށްފައެވެ.
