އެކި ކުށްތަކަށް އަރައިގަނެގެން ހައްޔަރުކުރާ މީހުންގެ ތެރެއިން ކުޑަކުދިން ފިޔަވާ އެހެން މީހުންގެ ވަނަވަރު އާންމުކުރުމަށް ފުލުހުން ނިންމައިފިއެވެ.
ފުލުހުން ވިދާޅުވީ، އެކި ކުށްތަކާއި ގުޅިގެން ފުލުހުންގެ ބެލުމުގެ ދަށަށް ގެނެވޭ މީހުންގެ ވަނަވަރު އާންމު ކުރަން ފަށާފައިވާ ކަމަށާއި އެހެންނަމަވެސް އެއްވެސް ކުޑަކުއްޖެއްގެ ވަނަވަރު އާންމު ނުކުރާނެކަމަށެވެ.
މީގެ ކުރީން ވެސް ފުލުހުން މިގޮތަށް އަމަލުކޮށްފައިވެ އެވެ. ނަމަވެސް އެ އުސޫލު ދޫކޮށްލުމަށް ފަހު އަލުން އެ ގޮތަށް އަމަލު ކުރަން ފެށި ވަކި ސަބަބެއް އެ އިދާރާއިން ހާމަކުރައްވައިފައެއް ނުވެއެވެ.
ބޮޑެތި ކުށްތަކަށް އަރައިގަންނަ ކުށްވެރިންގެ މައުލޫމާތު ސިއްރުކުރަމުންދާތީ އާންމުން އަބަދުވެސް އަންނަނީ ކަންބޮޑުވުން ފާޅުކުރަމުންނެވެ.
ދާދި ފަހުން ހިނގި 4 މައްސަލައެއްގައި ޝަމިލުވާ މީހުންގެ ވަނަވަރުވެސް ފުލުހުން ވަނީ ހާމަކޮށްފައެވެ. އެގޮތުން ނ. ހެނބަދޫގައި ފުލުހެއްގެ ސައިކަލުގައި ރޯކޮށްލި މައްސަލާގައި ހައްޔަރުކުރި ދެ މީހުންނާއި، ހުޅުމާލޭގައި ހިނގި ނުރައްކާތެރި އެކްސިޑެންޓުގައި ހިމެނޭ ތިން މީހުންގެ އިތުރުން މިއަދު ވ. ބޮޑުމޮހޮރާ އިން ބަނގުރަލާއެކު ހައްޔަރުކުރި ތިން މީހުންނާއި 48 ދަޅު ބަނގުރަލާއެކު ހައްޔަރު ކުރި ބިދޭސީ މީހާގެ ވަނަވަރުވެސް ފުލުހުން ވަނީ ހާމަކޮށްފައެވެ.
