އެމްއެމްޕީއަރުސީ ކޮރަޕްޝަން މައްސަލައިގައި ފުރިހަމަ ތަހުޤީގެއް ހިންގައި އެ މައްސަލަ ބަލާނެ ކަމަށާއި އެ މައްސަލައިގައި ޖަވާބުދާރީވާން ތައްޔާރަށް ހުންނެވި ކަމުގައި ރައްޔިތުން މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އެމްއެމްޕީއަރުސީ ކޮރަޕްޝަން މައްސަލައިގައި ފުރިހަމަ ތަހުޤީގެއް ހިންގައި އެ މައްސަލަ ބަލަން މި ސަރުކާރަށް ނުކެރޭނެ ކަމަށް ކުރީގެ ރައީސް އަބްދުﷲ ޔާމީން އަބްދުލް ގައްޔޫމް އެމަނިކުފާނުގެ ޕީއެންއެފް ޕާޓީގެ ޖަލްސާއެއްގައި ވިދާޅުވެ ކުރެއްވި ޗެލެންޖަށް ރައްދު ދެއްވައި ވާހަކަފުޅު ދައްކަވަމުން، ރޭ ޕީއެންސީ ހަރުގޭގައި ބޭއްވި ޕާޓީ ޖަލްސާގައި އަބްދުރަހީމް ވިދާޅުވީ، އެ މައްސަލަ ވެސް ބައްލަވާނެ ކަމަށާއި އެ މައްސަލައާއި ގުޅިގެން ފުރިހަމައަށް ޖަވާބުދާރީ ވެ ވަޑައިގަތުމަށްވެސް ތައްޔާރަށް ހުންނެވި ކަމަށެވެ.
އެގޮތުން އެމްއެމްޕީއާރުސީގެ މައްސަލަ ބަލައިފިނަމަ ދެން ވާނީ ކިހިނެއްތޯ ސުވާލުކުރައްވައި އަބްދުއްރަހީމް ވަނީ ވީހާވެސް އަވަހަކަށް މިނިވަން ކޮމެޓީއެއް ހައްދަވައި އެ މަނިކުފާނުގެ މައްސަލަ ބައްލަވަން ހަވާލު ކުރެއްވުމަށް ގޮވާލައްވައިފައެވެ. އަދި އެ ކޮމެޓީގެ ޗެއަރ އަކަށް ރައީސް ޔާމީން ލެއްވުމަށްވެސް އަބްދުއްރަހީމް ވަނީ ގޮވާލައްވައި ފާޑު ވިދާޅުވެފައެވެ.
އަދުއްރަހީމް މިފަދައިން ވިދާޅުވީ އެމްއެމްޕިއާރުސީގެ ހިޔާނާތުގައި އަބްދުއްރަހީމުވެސް ހިމެނޭ ކަމަށް ޔާމީނު ތުހުމަތު ކުރެއްވުމާއި ގުޅިގެންނެވެ.
ޑެޕިއުޓީންގެ ގޮތުގައި ތިއްބަވަން ވާނީ ޑރ.ޖަމީލު އާއި މަލީހު. މެންބަރުންގެ ގޮތުގައި ހުސައިން ވަހީދާއި ޕާޕާއާ. އަޅުގަނޑު މިހިރީ ޖަވާބުދާރީވާން ތައްޔާރަށް. އެކަމަކު އެއާއެކީގައި އަނެއް ކޮމިޝަން އުފައްދަވަން ވާނެ. އެ ކޮމިޝަނުގެ ޗެއާއަކަށް އަޅުގަނޑު، ދެން މެންބަރުންނަށް ލާންވާނީ އަޅުގަނޑު ބުނާ ބައެއް އޭރުން އަޅުގަނޑުމެން އެމްއެމްޕީއާރުސީގެ މައްސަލަ ބަލާނަން- އަބްދުއްރަހީމް
އަބްދުއްރަހީމް ވިދާޅުވީ، 2013 ވަނަ އަހަރު ވެރިކަމަށް ވަޑައިގެންނެވިއިރު ޔާމީނަށް ނިސްބަތްވާ އެއްވެސް އެކައުންޓެއްގައި އެއްލައްކަ ރުފިޔާ ހަމަނުވާ ކަމަށާއި ވެރިކަމުން ފައިބާވަޑައިގެންނެވިއިރު، 500 މިލިޔަނުން އެ އެކައުންޓުތަކުގައި ފައިސާ ހުރި ކަމަށެވެ. އަދި އެ ފައިސާއަކީ ކިހިނެއް ހޯދި ފައިސާއެއްތޯ އަބްދުއްރަހީމް ވަނީ ސުވާލު އުފައްދާފައެވެ.
