މާލޭގައި އަނެއްކާވެސް މީހަކަށް ވަޅިން ބިރުދައްކައި އޭނާގެ އަތުން ގިނަ އަދަދެއްގެ ފައިސާ ފޭރިއްޖެއެވެ.
އެގޮތުން ބޭސް ފަރުވާއަށް މާލެ އައިސް އުޅުނު އުމުރުން ދުވަސްވީ މީހަކު ދިރިއުޅޭ ކޮޓަރިއަށް ވަދެ އޭނާ އައްސައި ވަޅިން ބިރުދެއްކުމަށްފަހު ފައިސާއާއި ފޯރު ވަނީ ފޭރިގަނެފައެވެ.
މި ވާހަކަތައް ހިސާކޮށް އެކްގައި ކުރި ޕޯސްޓެއްގައި އޭނާގެ ދަރިފުޅު ބުނެފައިވަނީ، ބައްޕަ އުޅެމުން އައި ކޮޓަރިޔަ މެންދުރު ދެ މީހަކު ވަދެ ރަހީނުކޮށް ފައިސާ އައި ފޯނު ފެރިގަތީ ބަންދެ ވަޅިން ބިރުދައްކައިގެން ކަމަށެވެ.
މި މައްސަލައާއި ގުޅިގެން ފުލުހުން ވިދާޅުވީ، މާލެ އަށް ބޭސް ފަރުވާއަށް އައިސް ހުރި 62 އަހަރުގެ މީހަކު ކުއްޔަށް ހުރި ކޮޓަރިއަށް ދެ މީހަކު ވަދެ ބިރުދައްކާ، އެ މީހާގެ ފޯނާއި ފައިސާ ފޭރުނު މައްސަލަ އިއްޔެގެ ވަގުތެއްގައި ރިޕޯޓްކޮށްފައިވާ ކަމަށެވެ.
މި މައްސަލައާއި ގުޅިގެން މިހާތަނަށް މީހަކު ހައްޔަރުކުރިކަމެއް ނުވަތަ ނޫންކަމެއް ފުލުހުން ހާމަކޮށްފައި ނުވާއިރު، އެ ފަރާތުން ވިދާޅުވީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.
ޕޯސްޓާއެކު ހިއްސާކުރި ފޮޓޮއިން ފެންނަ ގޮތުގައި އުމުރުން ދުވަސްވީ މީހާގެ އަތް ވަނީ ވަރަށް ބޮޑަށް ނޫފައިގަނެފައެވެ.
