ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން ޕެކިން ފެސިލިޓީއެއް އެޅުމަށް ހަމަޖެހިފައިވާ ކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ ޑިރެކްޓަރު ޖެނެރަލް ޑރ. ހުސައިން ސިނާން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ ޕްރޮގްރާމްގައި ވާހަކަދައްކަމުން ސިނާން ވިދާޅުވީ ކުދި އަދި މެދުފަންތީގެ ވިޔަފާރިތަކުން މަސް އެކްސްޕޯޓް ކުރުމަށް ފެކިން ފެސިލިޓީއެއް އަޅަން ހަމަޖެހިފައިވާ ކަމަށާއި މިކަމަށް ބޭނުންވާ ފައިސާ އިސްލާމިކް ޑިވެލޮޕްމަންޓް ބޭންކުން ހަމަޖެހިފައިވާ ކަމަށެވެ.
ރާއްޖޭގައި މަދުން މަސް އެކްސްޕޯޓު ކުރާ ފަރާތްތަކުގެ ތެރޭގައި ކުދި އަދި މެދު ފަންތީގެ ވިޔަފާރިތައް ހިމެނޭކަން ފާހަގަ ކުރައްވާ ސިނާން ވިދާޅުވީ އެފަރާތްތަކުން މަސް ޕެކް ކުރުމުގައި ޖެހެނީ އަމިއްލަ ކުންފުނިތަކުގެ އެހީތެރިކަން ހޯދަން ކަމަށެވެ.
ސިނާން ވިދާޅުވީ 100 ނުވަތަ 200 ކިލޯ އެކްސްޕޯޓުކުރަން ބޭނުންވާ ފަރާތްތަކަށްވެސް މިޕެކިން ފެކްޓްރީން އެފުރުސަތު ލިބިގެންދާނެ ކަމަށެވެ. އަދި ހުޅުމާލޭގައި އިމާރާތް ކުރުމަށް ނިންމާފައިވާ މިޕެކިން ފެކްޓްރީ، މިފްކޯ އިން މި ފެކްޓްރީ ތަރައްގީކުރި ނަމަވެސް މަދުން މަސް އެކްސްޕޯޓުކުރާ ފަރާތްތަކުގެ ހިއްސާ އޮންނަ ފަރާތަކަށް ނުވަތަ ޔޫނިއަންއަކަށް ފެކްޓްރީގެ ޕަރޭޝަންތައް ކުރިއަށް ގެންދަން ނިންމާފައިވާ ކަމަށެވެ.
ހަމައެއާއެކު، ޕެކިން ފެސިލިޓީގެ އޮޕަރޭޝަން ކުރިއަށްގެންދާނެ ގޮތަކާ ގުޅޭގޮތުން މިފްކޯއާއެކު މަޝްވަރާކުރަމުންދާކަން ފާހަގަކުރައްވާ ސިނާން ވިދާޅުވީ ހުރިހާ މަސްވެރިކަމަށްވެސް ހައްލު ގެނައުމަށް މަސައްކަތްކުރަމުން އަންނަކަމަށެވެ.
