ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ލޭބަރ ރިލޭޝަންސް އޮތޯރިޓީ، ދާޚީލީ ސަލާމަތާއި ފަންނިއްޔާތާ ބެހޭ ވުޒާރާގެ ދަށަށް ބަދަލުކުރައްވައިފިއެވެ.
މި ނިންމެވުން ރައީސް ނިންމަވާފައިވަނީ ޤާނޫނު އަސާސީގެ 116 ވަނަ މާއްދާގެ ދަށުން އެ މަނިކުފާނަށް ލިބިވަޑައިގަންނަވާ އިޚްތިޔާރުގެ ދަށުންނެވެ.
މި މަހުގެ 6 ވަނަ ދުވަހުން ފެށިގެން ލޭބަރ ރިލޭޝަންސް އޮތޯރިޓީ ހިނގަމުންދާނީ ދާޚީލީ ސަލާމަތާއި ފަންނިއްޔާތާ ބެހޭ ވުޒާރާގެ ދަށުންނެވެ.
މި ކަމާ ގުޅޭ ގޮތުން ވަޒީރުންގެ މަޖިލީހުގައި މަޝްވަރާ ބައްދަލުވުމެއް ވެސް ބޭއްވުނުކަން ފާހަގަކޮށްލެވެއެވެ. އެ ބައްދަލުވުމަށް ފަހު ރައީސުލްޖުމްހޫރިއްޔާ މި ގޮތަށް ނިންމެވީ، ޤަވާއިދާ ޚިލާފަށް ދިވެހިރާއްޖޭގައި އުޅެމުންދާ ބިދޭސީންގެ މައްސަލަ ޙައްލުކުރުމާގުޅޭގޮތުން ކުރެވުނު މަޝްވަރާތަކާ ގުޅިގެންނެވެ. އެ ގޮތަށް ނިންމެވުމަށް ވަޒީރުންގެ މަޖިލީހުން ރައީސްއަށް ލަފާދެއްވައިފައިވާކަން ވެސް ފާހަގަކޮށްލެވެއެވެ.
މީގެ ކުރިން ލޭބަރ ރިލޭޝަންސް އޮތޯރިޓީ ހިނގަމުން އައީ މަތީ ތަޢުލީމާއި މަސައްކަތްތެރިކަމާ ހުނަރުތައް ތަރައްޤީކުރުމާ ބެހޭ ވުޒާރާގެ ދަށުންނެވެ.
