ވިނަރެސް ފްލެޓްގެ އެކްސެސް ކޮންޓްރޯލް ސިސްޓަމް މަރާމާތުކޮށް، އެ ފްލެޓްތަކުގައި ދިރިއުޅޭ ފަރާތްތަކަށް ޓެގު ދޫކުރަން ފަށައިފިއެވެ.
ހައުސިންގް ޑިވެލޮޕްމެންޓް ކޯލަރޭޝަން (އެޗްޑީސީ)އިން ހާމަކުރި ގޮތުގައި އެ ސިސްޓަމް އަންނަ އާދީއްތަ ދުވަހުން ފެށިގެން ބޭނުންކުރަން ފަށާ ގޮތަށް އެ ކުންފުނިން ވަނީ ނިންމާފައެވެ.
ފްލެޓްތަކުގެ އެކްސެސް ޓެގުތައް ދޫކުރާނީ ވިނަރެސް 10 ގެ މެނޭޖުމަންޓް އޮފީހުންކަމަށް ވެސް އެޗްޑީސީން ނެރުނު އިއުލާނުގައި ބުނެފައިވެއެވެ. އާދީއްތަ ދުވަހުގެ ކުރިން ޓެގު ނެގުމަށް އެޗްޑީސީން ވަނީ އިލްތިމާސް ކޮށްފައެވެ.
ވިނަރެސް އިމާރާތްތަކުގައި ދިރިއުޅޭ މީހުންގެ ސަލާމަތާއި ރައްކާތެރިކަން ކަށަވަރުކުރުމަށް އެޗްޑީސީން ފޯރުކޮށްދިން މި އެކްސެސް ސިސްޓަމްތަކަށް ގެންލުންދޭ ފަރާތްތަކާ މެދު ފިޔަވަޅުއަޅާނެކަމަށް އެޗްޑީސީން ބުނެއެވެ.
