އިސްރާއީލް ޕާސްޕޯޓު ރާއްޖޭގައި މަނާކުރުމަށް އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހަޅާފައިވާ ބިލްގެ މަސައްކަތް މަޖިލީހުން ކުރިއަށް ނުދާތީ އެ މަސައްކަތް ހުއްޓިފައި އޮތް ސަބަބު ސާފު ކުރުމަށް ގަލޮޅު ދެކުނު ދާއިރާގެ މެމްބަރު މީކާއިލް އަޙްމަދު ނަސީމް މަޖިލީހުގެ ރައީސްގެ އަރިހުން އެދިއްޖެއެވެ.
އިދިކޮޅު އެމްޑީޕީގެ މެންބަރު މީކާއީލް ހުށަހެޅުއްވި އެ ބިލް ރައްޔިތުންގެ މަޖިލީހުގެ ތަޅުމަށް ބަލައިގަނެ، މަޖިލީހުގެ 241 ކޮމިޓީއަށް ފޮނުވިތާ ދެ މަސް ދުވަސް ވީ އިރު، ކޮމިޓީގައި ބިލްގެ މަސައްކަތް އެޖެންޑާ ކޮށްފައި ނުވާކަން ފާހަގަކޮށްލެވެއެވެ.
އެހެންކަމުން މަޖިލީހުގެ ރައީސް ޢަބްދުއްރަހީމް ޢަބްދުﷲއަށް، މީކާއިލް ވަނީ ސިޓީއެއް ފޮނުއްވާފައެވެ. އެ ސިޓީގައި އިސްރާއީލްގެ ޕާސްޕޯޓުގައި ރާއްޖެ އެތެރެ ނުވެވޭނެކަން ކަށަވަރުކުރުމަށް އެ ބޭފުޅާ ހުށަހެޅުއްވި ބިލް މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގައި އެޖެންޑާ ނުކޮށް ބާއްވާފައި އޮންނަތާ އިއްޔެއާ ހަމައަށް 59 ދުވަސްވެފައިވާކަމަށް މީކާއިލް ވިދާޅުވެފައިވެއެވެ. އެހެންކަމުން ބިލުގެ މަސައްކަތް ކުރުމަށް ކޮމިޓީގައި އެޖެންޑާ ނުކުރާ ސަބަބު ބުނެދިނުމަށް މީކާއިލް އެދިލައްވާފައިވެއެވެ.
މީކާއީލް މިކަމަށް އެދިވަޑައިގެންފައިވާއިރު ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން ކެބިނެޓުން ވަނީ އިސްރާއީލް ޕާސްޕޯޓް މަނާކުރުމަށް ކުރަންޖެހޭ ގާނޫނީ މަސައްކަތްތައް މަޖިލީހުގެ ތެރެއިން ކުރުމަށް ނިންމާފައިވާކަން މީގެ ދުވަސްތަކެއް ކުރިން ހާމަކޮށްފައެވެ. އަދި ސަރުކާރުގެ ކެބިނެޓުން ވަނީ އިޒްރޭލު ޕާސްޕޯޓު މަނާކުރުމަށް ގާނޫނަށް ގެންނަން ޖެހޭ އިސްލާހުތައް ގެނައުމަށް ފާސްކޮށްފައެވެ.
