އިންޑިޔާއާއި ދިވެހި ސަރުކާރާއި ދެމެދު މިނިވަން ވިޔަފާރީގެ އެއްބަސްވުމެއް ޤާއިމްކުރުމަށް ދިވެހި ސަރުކާރުން އިންޑިޔާއަށް ހުށަހަޅައިފިއެވެ.
އިންޑިއާގެ ހާރިޖީވަޒީރު ޑރ.ސުބްރަމާނިޔަމް ޖައިޝަންކަރު ރާއްޖެއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ޚާރިޖީ ވަޒީރު މޫސާ ޒަމީރާއެކު ރޭ ބޭއްވި މަޝްވަރާ ބައްދަލުވުމަށްފަހު ނޫސްވެރިންނާ މައުލޫމާތު ހިއްސާ ކުރައްވަމުން، ޒަމީރު ވިދާޅުވީ އިގުތިސާދާއި ވިޔަފާރިއާއި އިންވެސްޓުމެންޓާއި ތައުލީމާއި ހުނަރު އިތުރުކުރުމާއި ސިއްހަތާއި ފަތުރުވެރިކަމާއި ޒުވާނުންނާއި ކުޅިވަރު އަދި ދިފާއާއި ސަލާމަތާ ގުޅޭ ކަންކަމުގައި އިންޑިއާ ހާރިޖީވަޒީރާ މަޝްވަރާކުރެއްވި ކަމަށެވެ.
އެގޮތުން، ރާއްޖެއާއި އިންޑިޔާގެ މެދުގައި ވިޔަފާރިއާއި އިންވެސްޓުމެންޓު އިތުރުކުރަން މިހާރަށްވުރެ ގިނަ ކަންތައްތަކެއް ކުރަންޖެހޭ ކަން ފާހަގަ ކުރައްވައި ޒަމީރު ވިދާޅުވީ،ރުންހުރި ނަފާކުރުވަނިވި ވިޔަފާރީގެ ގުޅުމެއް ދެ ގައުމުގެ މެދުގައި ބިނާކުރުމަށް މިހާރަށްވުރެ ހަރުދަނާ މެކޭނިޒަމްތަކެއް ތައާރަފުކުރަން ދެ ގައުމުގެ ސަރުކާރުތައް އޮތީ ތައްޔާރަށް ކަމުގައި ވިދާޅުވެފައެވެ.
އެގޮތުން ރާއްޖެއާއި އިންޑިޔާގެ މެދުގައި މިނިވަން ވިޔަފާރީގެ އެއްބަސްވުމެއް ގާއިމުކުރުމުގެ މަޝްވަރާތައް ފެށުމަށް ރައީސް ޑރ.މުހައްމަދު މުއިއްޒުގެ ފަރާތްޕުޅުން އިންޑިޔާ ސަރުކާރަށް ހުށަހަޅާއިފައިވާކަމަށްވެސް ޒަމީރު ވަނީ ވިދާޅުވެފައެވެ.
މި އެއްބަސްވުމުގެ ސަބަބުން ދެ ގައުމުގެ މެދުގައި ގާއިމުކުރެވޭ މިނިވަން ވިޔަފާރީގެ އެއްބަސްވުމާއި ވިޔަފާރިއާ ގުޅުންހުރި އެހެނިހެން އެއްބަސްވުންތަކުގެ ތެރެއިން ރާއްޖެއާއި އިންޑިއާގެ މެދުގައި ވިޔަފާރީގެ މުއާމަލާތްތައް ކުރުން އިތުރަށް ފަސޭހަކުރެވި ވިޔަފާރީގެ އައު މަގުތައް ހުޅުވިގެންދާނެ ކަމަށްވެސް ޒަމީރު ވަނީ ވިދާޅުވިއެވެ.