އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓް ފެސިލިޓީގެ އެހީގައި 28 ރަށެއްގައި ފެނާއި ނަރުދަމާ ނިޒާމް ގާއިމްކޮށް މިއަދު ދިވެހި ސަރުކާރާއި ހަވާލުކޮށްފި އެވެ.
ރާއްޖޭގެ 28 ރަށެއްގައި ފެނާއި ނަރުދަމާ ގާއިމްކުރުމަށް 2019 ވަނަ އަހަރު ރާއްޖެ އާއި އިންޑިއާގެ އެގްޒިމް ބޭންކާ އެކު ސޮއިކޮށް ހިންގާފައިވާ 800 މިލިއަން ޑޮލަރުގެ ކެރެޑިޓް ފެސިލިޓީ އެއްބަސްވުމުގެ މަޝްރޫއު މިއަދު ނިންމާ ދިވެހި ސަރުކާރާއި ހަވާލުކޮށްފައި ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރެވެ.
ރައީސް އޮފީހުގައި މިއަދު ބޭއްވި ބައްދަލުވުމުގައި އިންޑިއާގެ ފޮރިން މިނިސްޓަރު ޖައިޝަންކަރު ވިދާޅުވީ ރާއްޖެ އާއި އިންޑިއާ ދެމެދު އޮންނަނީ ހާއްސަ ގުޅުމެއް ކަމަށާއި އެއް ބަޔަކު އަނެއް ބަޔަކަށް ދިމާވާ ކޮންމެ ގޮންޖެހުމެއްގައި ދެގައުމުން ވެސް އެއްބާރުލުމާއި އެހީތެރިކަން ލިބޭ ކަމަށެވެ.
ފެނާއި ނަރުދަމާގެ މިމަޝްރޫއުގެ ސަބަބުން 28،000 އަށް ވުރެ ގިނަ މީހުންގެ އާބާދީއަކަށް އަސާސީ ހިދުމަތްތައް ފޯރުކޮށްދެވިގެންދާނެ ކަން ފާހަގަކުރައްވާ ޖައިޝަންކަރު ވިދާޅުވީ މިމަޝްރޫއުގައި ނަރުދަމާ ނިޒާމް ގާއިމްކުރީ ގޭގެއަށް ނަރުދަމާ ހޮޅި ގުޅުމާއި ޕަންޕް ސްޓޭޝަން އެޅުމާއި މޫދަށް ހޮޅި ބޭރުކުރުން ހިމަނައިގެން ކަމަށާއި ފެނުގެ ނިޒާމުގައި ބޭނުން ކޮށްފައި ވަނީ އެންމެ ފަހުގެ ވަސީލަތްތައް ކަމަށެވެ.
މިއަދު ނިންމާ ހަވާލުކޮށްފައިވާ ފެނާއި ނަރުދަމާގެ މަޝްރޫއުގެ ތެރޭގައި 22 ރަށެއްގެ ފެނުގެ ނިޒާމު ތަރައްގީ ކުރުމާއި ދެ ރަށެއްގެ ނަރުދަމާގެ ނިޒާމުގެ އިތުރުން ހަތަރު ރަށެއްގައި ވަނީ ފެނާއި ނަރުދަމާގެ މަޝްރޫއު އެކީގައި ކުރިއަށް ގެންގޮސްފައެވެ.
