އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު “ތިލަމާލެ” ބްރިޖުގެ މަސައްކަތްތައް ބައްލަވާލައްވައިފިއެވެ.
ޖައިޝަންކަރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އިންޑިއާގެ އެހީތެރިކަމާ އެކު ކުރިއަށްދާ ތިލަމާލެ ބްރިޖު މަޝްރޫއު ފުރިހަމަވުމާ އެކުގައި، އިގްތިސާދަށް ކުރިއެރުން ލިބި މާލެ، ވިލިމާލެ، ގުޅިފަޅު އަދި ތިލަފުށި ސަރަހައްދު ވަރަށް ބޮޑަށް ގުޅިގެންދާނެ ކަމަށެވެ.
ބްރިޖުގެ މަސައްކަތްތައް ބައްލަވާލައްވާލުމަށް ފޮރިން މިނިސްޓަރު މޫސާ ޒަމީރާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބާއި އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ވެސް ވަނީ އެސަރަހައްދަށް ވަޑައިގަންނަވާފަ އެވެ.
ފޮރިން މިނިސްޓަރު ޒަމީރު އެކްސްގައި ކުރެއްވި ޕޯސްޓެއްގައި ވަނީ ތިލަމާލެ ބްރިޖު މަޝްރޫއު ހިނގަމުންދާ ގޮތް ޖައިޝަންކަރާއި މުއްތަލިބް އާ އެކީގައި ބައްލަވާލެއްވުމުގެ ފުރުސަތު ލިބިވަޑައިގަތުމާ ގުޅިގެން ވަރަށް ބޮޑަށް އުފާ ކުރައްވާ ކަމަށް ވިދާޅުވެފައެވެ.
މީގެއިތުރުން، މިމަޝްރޫއުއަކީ ތިލަމާލެ ބްރިޖު މަޝްރޫއަކީ އިގްތިސާދީ ތަނަވަސްކަމާ ގުޅިފައި އޮތް ތަރައްގީގެ އެންމެ ބޮޑު އެއް މަޝްރޫއު ކަމަށް ވެސް ޒަމީރު ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ސޯލިހް ސަރުކާރުން ފަށާފައިވާ މި ބްރިޖުގެ މަސައްކަތް އިންޑިއާގެ އެފްކޮންސް އިންފްރާސްޓްރަކްޗާއާ ހަވާލު ކުރީ އޮގަސްޓް 26، 2021 ގައެވެ.
ތިލަމާލެ ބްރިޖު މަޝްރޫއުގެ ދަށުން މައިގަނޑު ތިން ބްރިޖެއް އުޅެމަށް ވަނީ ހަމަޖެހިފައެވެ. އެއީ މާލެ އާއި ވިލިމާލެ ގުޅާލާ ބްރިޖު އާއި ވިލިމާލެ އާއި ގުޅީފަޅު ގުޅާލާ ބްރިޖު އަދި ގުޅީފަޅާއި ތިލަފުށި ގުޅާލާ ބްރިޖު އެވެ.
