މޯލްޑިވިއަން އެއަރލައިންސްގެ ފްލައިޓަކުން ކޮލަމްބޯއަށް ފުރަން ގޮސް ހުރި ފަސިންޖަރެއްގެ އަތުން މަސްތުވާތަކެތިކަމަށް ޝައްކުކުރެވޭ ފެކެޓުތަކެއް ފެނިއްޖެއެވެ.
އޭވިއޭޝަން ސެކިއުރިޓީ ކޮމާންޑުން ވަނީ ރޭ މި ކަން ހާމަކޮށް ‘އެކްސް’ ގައި ޕޯސްޓެއް އާންމުކޮށްފައެވެ. އޭވިއޭޝަން ސެކިއުރިޓީ ކޮމާންޑުން ބުނީ މަސްތުވާތަކެތިކަމަށް ބެލެވޭ ތަކެތި ހޯދާފައިވަނީ އެއަރޕޯޓުގެ ސެކިއުރިޓީ މުވައްޒަފުން ފަސިންޖަރުން ބަލައި ފާސްކުރުމުގެ ތެރޭގައި، އިއްޔެ 17:13 ގައެވެ.
އޭނާ ދަތުރު ކުރުމަށް ހަމަޖެހިފައިވަނީ ގައުމީ އެއާލައިން، މޯލްޑިވިއަންއިން ސްރީލަންކާގެ ކޮލަމްބޯއަށެވެ.
މި ހާދިސާއާ ގުޅިގެން، އެ ފަސިންޖަރު ވަނީ ކަމާބެހޭ އިދާރާތަކާ ހަވާލުކުރެވިފައެވެ.
