ރާއްޖޭއާއި އިންޑިޔާއާއި ދެމެދު ހީނަރުވެފައިވާ ގުޅުން ރަނގަޅުކޮށް ދޭދޭ ޤައުމުގެ މެދުގައި އޮތް ގުޅުން ބަދަހިކުރުމަށް ސަރުކާރުން ކުރައްވަމުން ގެންދަވާ މަސައްކަތްތަކަށް އެމްޑީޕީގެ ރައީސް އަދި ކުރީގެ ޚާރިޖީ ވަޒީރު އަބްދުﷲ ޝާހިދު މަރުހަބާ ވިދާޅުވެއްޖެއެވެ.
އިންޑިއާގެ ހާރީޖީވަޒީރު ޑރ.ސުބްރަމާނިޔަމް ޖައިޝަންކަރު ރާއްޖެއަށް ކުރައްވަމުން ގެންދަވާ ތިން ދުވަހުގެ ދަތުރުފުޅުގެ ތެރެއިން އިއްޔެ އެމްޑީޕީގެ އިސްވެރިންނާއެކު ބޭއްވެވި ބައްދަލުވުމަށްފަހު ޝާހިދު ކުރެއްވި އެކްސް ޕޯސްޓެއްގައި ވިދަޅުވީ،
އިންޑިޔާއާ ދެކޮޅަށް މި ސަރުކާރުން ބޭނުންކުރި ހަރުކަށި ޝިއާރުތަކާއި ކުރި ފުރައްސާރައާއި ތަރައްގީގެ ޒަމާންވީ ބައިވެރިއެއް ސަރަހައްދީ ބުލީއެއްގެ ގޮތުގައި ސިފަކުރި ކުރުމުގެ ސަބަބުން ބައިނަލްއަގުވާމީ މުޖުތަމައުގައި ރާއްޖޭގެ މަގާމަށް އުނިކަން ލިބިފައިވާ ކަމަށެވެ.
އަދި އެކަންކަމުގެ ސަބަބުން ރާއްޖެއަށް އިގުތިސާދީ ގެއްލުންތައް ލިބި ކުރިމަތިވާންނުޖެހޭ ދަތިތަކާއި ގޮންޖެހުންތައް ކުރިމަތިވެފައިވާ ކަމަށްވެސް ޝާހިދު ކުރެއްވި ޕޯސްޓްގައި ވިދާޅުވިއެވެ.
އެގޮތުން ބައިނަލްއަގުވާމީ އެހީއަށް އެދި 911 އަށް ދިވެހިރާއްޖެއިން ގުޅައިލާ ކޮންމެ ފަހަަރެއްގައި އެންމެ ފުރަތަމަ އެހީތެރިވުމަށް އިސްނަގާނީ އިންޑިޔާކަން ފާހަގަކުރައްވައި ޝާހިދު ވިދާޅުވީ، ސަރުކާރުން އިންޑިޔާއާމެދު ގެންގުޅުނު އިންޑިއާ އައުޓް ސިޔާސަތު ބަދަލުކޮށް އިންޑިޔާއާއެކު ގުޅުން ބަދަހިކުރުމަށް މަރުހަބާ ވިދާޅުވާ ކަމަށެވެ.
ހަމަ އެޔާއެކު އިންޑިޔާ-ރާއްޖެ ގުޅުމާމެދު ސަރުކާރުން ގެންގުޅޭ ސިޔާސަތަށް ގެނެސްފައިވާ ބަދަލަކީ ދެމެހެއްޓެނެވި ދިގުލައިގެން ދަނިވި ބަދަލަކަށްވާނެކަމަށް އެމްޑީޕީން އުންމީދުކުރާ ކަމަށްވެސް ވިދާޅުވެފައެވެ.
އޭގެ އިތުރަށް ސަރުކާރުގެ މަސްއޫލުވެރިން އިންޑިޔާއާ މެދު ހިންގަވާފައިވާ އަމަލުތަކާއި ހައްދަވާފައިވާ އިތުރުފުޅުތަކާމެދު ސަރުކާރުން ފާޅުގައި މައާފަށް އެދުމަށް ޝާހިދު ގޮވައިލެއްވިއެވެ.