އިސްރާއީލުގެ ސިފައިން ފަލަސްޠީނުގައި ހިންގަމުން އަންނަ އުދުވާނުގައި ޣައްޒާގައި ހުންނަ އަލް-ތާބިއީން ސްކޫލަށް ދިން ހަމަލާއާއި ގުޅިގެން އިސްރާއީލުގެ ސިފައިން ޒިންމާދާރުކުރުވައި ފަލަސްޠީނުގެ ރައްޔިތުން ހިމާޔަތްކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިނަލްއަގުވާމީ މުޖުތަމައަށް ގޮވާލައްވައިފިއެވެ.
އިސްރާއީލުން ޣައްޒާގެ އިތުރު ސްކޫލަކަށް ދިން މި ޙަމަލާ ކުށްވެރިކުރައްވައި އެމަނިކުފާނުގެ އެކްސްގައި ކުރެއްވި ޕޯސްޓެއްގައި ވިދާޅުވީ، މިދިޔަ އަހަރުގެ އޮކްޓޯބަރު މަހުން ފެށިގެން އިސްރާއީލުން ފަލަސްތީނަށް ދެމުންދާ ހަމަލާތަކުގައި 39،000 އަށްވުރެ ގިނަ މީހުން ޝަހީދުވެފައިވާ ކަމަށާއި އެ ހަނގުރާމަ ހުށްޓުމަށް ސުލްހައިގެ އެއްބަސްވުމަކަށް ދިއުމުގެ އެއްވެސް މަސައްކަތް އިސްރާއީލުން ކުރަމުން ނުދާ ކަމަށެވެ.
އެގޮތުން އެ ހަމަލާގައި އަލް-ތަބިއީން ސްކޫލްގައި ހިމާޔަތް ހޯދަމުންދިޔަ އަންހެނުންނާއި ކުޑަކުދިންނާއި އުމުރުން ދުވަސްވީ މީހުން އަނިޔާވެފައިވާ އަދި ޝަހީދުވެފައިވާ ހިތާމަވެރި ފޮޓޯތައް ދައުރުވަމުންދާ ކަން ވެސް ރައީސް ފާހަގަކުރެއްވިއެވެ.
މީގެ އިތުރުން ރައީސް ވަނީ މިއީ ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުތަކާ ކަނޑައެޅިގެން ހިލާފު އަމަލެއްކަން ފާހަގަކުރައްވައި މި އަމަލުތަކާއި ގުޅިގެން އިސްރާއީލު ޒިންމާދާރުކުރުވައި ފަލަސްޠީނުގެ ރައްޔިތުންނަށް ވަގުތުން ހިމާޔަތްދިނުމަށް ބައިނަލްއަޤްވާމީ މުޖުތަމަޢަށް ގޮވާލައްވައިފައެވެ.
ޣައްޒާ ސިޓީގެ ދަރަޖު ސަރަޙައްދުގައި ހުރި، ގެދޮރު ގެއްލިފައިވާ މީހުން ހިމާޔަތް ހޯދަން ވަދެ ތިބި ސްކޫލަށް އިސްރާއީލުން ދިން ހަމަލާއެއްގައި 100 އަށް ވުރެ ގިނަ މީހުން ވަނީ ޝަހީދުވެފައެވެ. އެ ހަމަލާ ދިން އިރު ސްކޫލުގައި 250އަށް ވުރެ ގިނަ މީހުން ތިބި އިރު ގިނަ ބަޔަކަށް ވަނީ އެކި ވަރުގެ އަނިޔާ ލިބިފައެވެ.