ރައީސް އިބްރާހީމް މުހައްމަދު ޞާލިހްގެ ސަރުކާރުން ފެށްޓެވި ގެދޮރުވެރިޔާ މަޝްރޫޢުގެ ދަށުން ދޫކުރި 4000 ފްލެޓް އޮކްޓޫބަރުމަހުގެ ނިޔަލަށް އޭގެ ހައްޤުވެރިންނަށް ދެވޭނެ ކަމުގައި ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ރައްޔިތުންގެ މަިލިހުގެ މިއަދުގެ ޖަލްސާގައި ގެދޮރުވެރިކަމާއި ގުޅުންހުރި މަޝްރޫއުތަކާއި ގުޅިގެން މިނިސްޓަރ ހައިދަރަށް ކުރެއްވި ސުވާލުތަކަށް ޖަވާބު ދެއްވަމުން ހައިދަރު ވިދަޅުވީ، ރައީސް ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގެން އިރުވެސް އޭސީސީން ވަނީ ފްލެޓްތަކުގެ މަޝްރޫޢު ހުށްޓުވާފައިކަމަށާއި އެހެންކަމުން ފްލެޓްތަކުގެ އެއްވެސް ކަމެއް މި ވެރިކަމުގައި ނުކުރެވޭކަމަށެވެ.
އެގޮތުން 7000 ށްވުރެ ގިނަ ރައްޔިތުންގެ ޝަކުވާތަކާއި ގުޅިގެން އޭސީސީން ފްލެޓްތަކުގެ މަސައްކަތް ހުށްޓާލައިފައިވާކަމަށާއި އެ މަސައްކަތް މިނިސްޓްރީއާއި ހަވާލުކުރަންދެން އެކަމާއި ގުޅުންހުރި އެއްވެސް މަސައްކަތެއް ނުކޮށް ތިބެން ޖެހުނުކަމުގައި މިނިސްޓަރު ވަނީ ވިދާޅުވެފައެވެ.
އެގޮތުން މިއަހަރުގެ ފެބްރުއަރީގައި އޭސީސީން އެ މަސައްކަތް މިނިސްޓްރީއާއި ހަވާލުކުރީ ބައެއް ކަންކަން ކުރުމަށް ލާޒިމްކޮށްކަން ފާހަގަކުރައްވައި ވަޒީރު ހައިދަރު ވިދާޅުވީ، އުސޫލާ އެއްގޮތަށް ޕޮއިންޓް ދީފައިވާ ފޯމްތަކަށް ލިބިފައިވާ ޕޮއިންޓަށް ބަދަލު ނާންނަ ގޮތަށް ކަށަވަރުކޮށް މައްސަލަ ހުރި ފޯމްތައް މުރާޖާ ކުރުމަށް އޭސީސީން އަންގައިފައި ވާކަމަށާއި އަދި މައްސަލަ ހުރި ފޯމްތައް މުރާޖާ ކުރުމުގައި ހުރިހާ އެންމެންގެ މެދުގައި އެއް މިންގަނޑަކުން އަމަލުކުރުމަށާއި އެކަން ކަށަވަރުކުރުމަށް ވެސް އަންގާފައިވާ ކަމަށެވެ.
މީގެ އިތުރުން ހައިދަރު ވިދާޅުވީ ޕްލެޓް ލިސްޓް މި މަހުގެ މެދު ތެރޭގައި މުރާޖާ ކުރުމުގެ މަސައްކަތް ފެށިގެން ދާނެ ކަމަށެވެ. އެއާއެކު އެންމެ ހައްގުވާ 4000 ފަރާތްތަކަށް ފްލެޓް ހަވާލުކުރުމުގެ މަސައްކަތް އޮކްޓޫބަރު މަހުގެ ތެރޭގައި ނިންމާލެވޭނެ ކަމަށެވެ.