ބޯކޮށް ވާރޭވެހުމުގެ ސަބަބުން 9 ރަށެއްގައި ފެންބޮޑުވެއްޖެ އެވެ.
މިއަދު ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން އެކްސްގައި ކުރި ޕޯސްޓެއްގައި ވަނީ މިއަދު ހަވީރު 6 އާ ހަމަޔަށް 9 ރަށަކުން ވައިގަދަވެގެންނާއި ފެންބޮޑުވެގެން ރިޕޯޓު ކޮށްފައިވާ ރަށްތަކުގެ ލިސްޓެއް ހާމަކޮށްފައެވެ.
އެގޮތުން، ސ. މަރަދު، ސ. ފޭދޫ، ސ. ހިތަދޫ، ގއ. ދެއްވަދޫ، ޅ. ނައިފަރު، ޅ. ކުރެންދޫ، ކުޅުދުއްފުށި ސިޓީ، ހއ. ބާރަށް، ހއ. ދިއްދޫ ގައި ފެންބޮޑުވެފައިވާ ކަމަށް އެންޑީއެމްއޭ ވަނީ ބުނެފައެވެ.
ވިއްސާރާގައި ރަށްރަށަށް ލިބެމުންދާ ގެއްލުންތައް ކައިރިން ބަލަމުންދާ ކަމަށް ވެސް އެންޑީއެމްއޭ އިން ބުނެފައިވެއެވެ.
އެންޑީއެމްއޭގެ ޗީފް އެކްޒެކްޓިވް ހިސާން ހަސަންއަށް ހަވާލާދީ ރާއްޖޭގެ އޮންލައިން ނޫހެއްކަމަށްވާ ދެން އޮންލައިން ރިޕޯޓްކޮށްފައިވާ ގޮތުގައި ފެން ބޮޑުވެގެން ރިޕޯޓްކޮށްފައިވާ ރަށްތަކަކީ އާއްމުކޮށްވެސް ފެންބޮޑުވާ ރަށްތައް ކަމަށާއި، އެރަށްތަކުގައި މޫސުން ގޯސްވެ ވައިގަދަވުމުގެ ސަބަބުން ބައެއް ގެތަކުގެ ފުރާޅު ވެސް ވަނީ ވަޔާ އެއްލާލާފައެވެ.
“އެއްވެސް އާއިލާއެއް ބަދަލުކުރަންޖެހޭ ފަދަ ހާލަތެއް އަދި ނެތް” އޭނާ ވިދާޅުވި އެވެ.
ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގެ ސަބަބުން މިހަފްތާ މޫސުން ގޯސްވެ ބޯކޮށް ވާރޭ ވެހޭނެ ކަމަށް މޫސުމާއިބެހޭ ގައުމީ އިދާރާއިން ވަނީ ބުނެފައެވެ.
އެއިދާރާއިން ވަނީ މޫސުން ގޯސްވުމުގެ ސަބަބުން މިރޭ 7:00 އިން ދަންވަރު 1:00 ޖަހަންޖެހެން ހއ. އަތޮޅުން ފެށިގެން ތ. އަތޮޅާއި ހަމައަށް ރީނދޫ އެލާޓް ވެސް ނެރެފައެވެ.
