ރާއްޖެއަށް ޑްރަގް އެތެރެކުރަން އުޅުނު ނެދަލެންޑްސްއަށް ނިސްބަތްވާ މީހަކު ހައްޔަރުކޮށްފިއެވެ.
ފުލުހުން ވިދާޅުވީ ، މި މައްސަލައާއި ގުޅިގެން ހައްޔަރުކުރި 30 އަހަރުގެ ނެދަލެންޑްސް މީހާ ހައްޔަރުކޮށްފައި ވަނީ، އިއްޔެ ރާއްޖެ އައި އިރު އޭނާގެ ލަގެޖުން ފެނުނު 6 ކިލޯގެ ޑްރަގާއެކު ކޯޓު އަމުރެއްގެ ދަށުންކަމަށެވެ.
ހައްޔަރުކުރި މީހާގެ ދަބަހުން މަސްތުވާތަކެތި ހުރި ހަ ޒިޕްލޮކް ދަބަސްފެނިފައިވާކަމަށް އޭނާ ހައްޔަރުކުރުމަށް ނެރުނު ކޯޓު އަމުރުގައި ބުނެފައިވެއެވެ.
އެ މައްސަލައާއި ގުޅިގެން ކޯޓުގައި ނެދަލޭންޑްސް މީހާ ބުނެފައި ވަނީ އޭނާ ރާއްޖެ އައީ ޗުއްޓީ ހޭދަކުރަން ކަމަށެވެ. މަސްތުވާތަކެތި ފެނުނު ލަގޭޖަކީ އޭނާ އެއްޗެއް ނަމަވެސް އޭގެއިން ފެނުނު އެއްޗިއްސަކީ އޭނާ އެއްޗެހި ނޫން ކަމަށެވެ. ޕެކް ކުރުމަށްފަހު އޭނާ ލަގެޖަށް އެތަކެތި ލީ އެހެން މީހަކު ކަމަށް ބުނެފައިވެއެވެ.
އޭނާގެ ތަކެތި ނޫން ކަމަށް ބުނުމުން، ފުލުހުން ވަނީ ކޮންޓްރޯލް ޑެލިވަރީ އޮޕަރޭޝަނެއް ހިންގަން މަސައްކަތް ކޮށްފަ އެވެ. އެކަމަށް އޭނާ އެއްބާރުލުން ދިން ނަމަވެސް އެކަން ކުރެވޭގޮތް ނުވާ ކަމަށް ފުލުހުންނާ ހަވާލާދީ ކޯޓް އަމުރުގައި ބަޔާންކޮށްފައިވެއެވެ.
ކްރިމިނަލް ކޯޓުން ވަނީ އޭނާ 15 ދުވަހަށް ބަންދު ކުރަން އަމުރުކޮށްފައެވެ.
