މާލޭގައި ފެން ބޮޑުވުމުގެ ސަބަބުން ޒަރޫރީ ބޭނުމެއްގައި މެނުވީ ހަތަރު ފުރޮޅުލީ އުޅަނދު ނުދުއްވުމަށް ފުލުހުން އިލްތިމާސްކޮށްފިއެވެ.
ފުލުހުން އާންމުކޮށްފައިވާ މެސެޖެއްގައި ބުނެފައި ވަނީ ބޯކޮށް ވާރޭ ވެހި، މާލޭގެ މަގުތަކުގައި ފެން ބޮޑުވެ ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާތީ މަގުތަކުން ފެން ހިނދި އާންމު ހާލަތަށް މަގުތައް އަންނަންދެން މާލޭގެ މަގުތަކުގައި ބަރު އުޅަނދު ނުދުއްވުމަށެވެ.
މީގެއިތުރުން ޒަރޫރީ ބޭނުމެއްގައި މެނުވީ ހަތަރު ފުރޮޅުލީ އުޅަނދުތައް ނުދުއްވުމަށް ވެސް ފުލުހުން ވަނީ އެދިފައެވެ.
“މިފަދަ ހާލަތްތަކުގައި ރައްޔިތުންގެ ފަރާތުން ލިބެމުންދާ އެއްބާރުލުމާއި އެހީތެރިކަމަށްޓަކައި އިހްލާސްތެރިކަމާއެކު ޝުކުރު ދަންނަވަމެވެ،” ފުލުހުން ބުނެފައިވެއެވެ.
ރާއްޖެއަށް މިހާރު ކުރަމުންދާ ވިއްސާރައިގައި މާލެއަށް ބޯކޮށް ވާރޭވެހޭނެ ކަމަށާއި އެއްމަސް ދުވަހުގެ ވާރޭ މިއަދުން ފެށިގެން ބުރާސްފަތި ދުވަހުގެ ނިޔަލަށް ކުރުން އެކަށީގެންވާ ކަމަށް އަލް-ޖަޒީރާ ނޫހުން ވެސް ވަނީ ބުނެފައެވެ.
މީގެއިތުރުން މޫސުމާއިބެހޭ ގައުމީ އިދާރާއިން ވަނީ މާލެއަށް ގުގުރުމާއިއެކު ބޯކޮށް ވާރޭވެހި ފެންބޮޑުވާނޭ ކަމަށް ލަފާކުރެވޭތީވެ މިއަދުގެ 14:15 އިން ފެށިގެން 18:15 އަށް އޮރެންޖު އިންޒާރު ނެރެފައެވެ.
