މިހާރު މާލެއަށް ކުރަމުންދާ ވިއްސާރައިގައި މާލޭގެ 5 ގޭބިސީއަކަށް ފެން ވަދެ، ދިރިނޫޅެވޭވަރުގެ ގެއްލުންތައް ލިބުމުގެ ސަބަބުން އެ ގޭބީސީތަކުގައި ދިރިއުޅޭ މީހުންނަށް ވަގުތީ ހިޔާވަހިކަން ފޯރުކޮށްދީފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ހާމަކޮށްފިއެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ހާމަކުރި ގޮތުގައި މާލެއިން 5 ގޭބީސީ ހިމެނޭހެން ޖުމްލަ 23 މީހުންނަށް އިއްޔެ ވަނީ ބޯހިޔާވަހިކަން ފޯރުކޮށްދީފައެވެ. މީގެ ތެރޭގައި ހިމެނެނީ މާފަންނުގެ 2 ގެއަކާއި ގަލޮޅުގެ ގެއެއްގެ 3 އެޕަރޓްމަންޓެވެ. ވަގުތީ ހިޔާވަހިކަމުގައި ތިބި މީހުންނަށް ބޭނުންވާ އަސާސީ ކަންކަން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ގެންދަނީ ހަމަޖައްސަމުންނެވެ.
މީގެ އިތުރުން ވެސް 4 ގެއަކަށް ވިއްސާރައިގައި ލިބިފައިވާ ގެއްލުންތަކުގެ ސަބަބުން އެހީތެރިކަން ފޯރުކޮށްދިނުމުގެ މަސައްކަތް އިއްޔެ ކޮށްފައިވާނެކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނެފައިވެއެވެ.
އިއްޔެ މާލެއަށް ކުރި ގަދަ ވިއްސާރައިގައި ޖުމްލަ 251 ރިޕޯޓް ލިބިފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން މަޢުލޫމާތު ދެއެއެވެ.
