މާލެއަށް ކުރަމުންދާ ވިއްސާރައިގެ ސަބަބުން ގޭގެއަށް ފެން ވަނުން ހުއްޓުވުމަށްޓަކައި، މާލެ ސިޓީގެ ގޭގޭގެ ދޮރުމަތީގައި ވެލި ބަސްތާ ޖެހުމަށް ސްޓެލްކޯގެ މުވައްޒަފުން ކުރަމުންދާ މަސައްކަތް ބައްލަވާލެއްވުމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ރޭ ސްޓެލްކޯއަށް ޒިޔާރަތް ކުރައްވައިފިއެވެ.
މި ޒިޔާރަތުގައި ސްޓެލްކޯގެ މުވައްޒަފުން މާލެ ސިޓީގައި ކުރަމުންދާ މަސައްކަތްތައް ރޭވިފައިވާ ގޮތާއި ސްޓެލްކޯގެ އިންޖީނުގޭގެ ޑީވޯޓަރިންގ ނިޒާމު ބޭނުންކޮށްގެން އަމީނީ މަގާއި، އެ މަގާ ގުޅިފައިވާ މަގުތަކުގެ ފެން ހިންދުމުގެ މަސައްކަތް ސްޓެލްކޯއިން ކުރިއަށްގެންދާ ގޮތް އަބްދުއްރަހީމް ވަނީ ބައްލަވާލައްވާފައެވެ.
އަބްދުއްރަހީމްގެ އިތުރުން މިނިސްޓަރ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، މަރްޔަމް މާރިޔާ ވެސް މި ޒިޔާރަތުގައި ބައިވެރިވެލައްވާފައިވެއެވެ.
މާލެ ސިޓީއަށް އިއްޔެ ކުރި ވިއްސާރައިގައި ރައްކާތެރިކަމުގެ ފިޔަވަޅުތައް އެޅުމަށް އެންމެ ބޮޑަށް ތައްޔާރަށް އޮތް އެއް ކުންފުނިކަމުގައި ސްޓެލްކޯ ވާނެއެވެ. އެގޮތުން ވިއްސާރައާ ގުޅިގެން އިއްޔެ ލޮނުޒިޔާރަތްމަގު ސަރަހައްދުގައި ޑިސްޓްރިބިއުޝަން ކޭބަލެއް ޝޯޓްވެ، އެ ސަރަހައްދުން ކަރަންޓު ކެނޑުމުން، ލަސްތަކެއް ނުވެ ސްޓެލްކޯއިން ވަގުތީ ކޭބަލެއް އަޅައި، އެ ސަރަހައްދަށް އަލުން ކަރަންޓު ދޫކޮށްފައިވާކަން ފާހަގަކޮށްލެވެއެވެ.
