ވިއްސާރައިގެ ސަބަބުން ރައްޔިތުންނަށް ކުރިމަތިވެދާނެ ގެއްލުންތައް މޮނީޓާކޮށް، ހައްލު ހޯދުން އަވަސްކުރުމަށް ރައީސް ޑރ. މުޙައްމަދު މުޢިއްޒު އިސްކޮށް ހުންނަވައި ޓާސްކް ފޯހެއް އެކުލަވާލައްވައިފިއެވެ.
އެ ޓާސްކް ފޯހުގެ ފުރަތަމަ ބައްދަލުވުން ރޭ ވަނީ ރައީސުލްޖުމްހޫރިއްޔާގެ އޮފީހުގައި ބާއްވައިފައެވެ. ރައީސުލްޖުމްހޫރިއްޔާގެ އޮފީހުން ހާމަކުރީ މި ޓާސްކް ފޯސް އުފައްދަވާފައިވަނީ ރާއްޖެއަށް މިހާރު ކުރަމުންދާ ވިއްސާރައިގައި ޢާއްމު ރައްޔިތުންގެ ދިރިއުޅުމުގެ ޙާލަތަށް ބުރޫ އަރާފައިވާތީ، ވިއްސާރައާއި ގުޅިގެން ކުރިމަތިވަމުންދާ ކަންކަން މޮނިޓަރކޮށް ރައްޔިތުންނަށް ކުރިމަތިވާ ކަންކަމަށް އަވަސް ޙައްލު ހޯދައިދިނުމަށްޓަކައިކަމަށެވެ.
ރޭ ބޭއްވި ޓާސްކްފޯސްގެ ފުރަތަމަ ބައްދަލުވުމުގެ ޗެއަރ ކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ޓާސްކްފޯހުގައި ހިމެނިވަޑައިގަންނަވާ މެންބަރުން:
- ޑިފެންސް މިނިސްޓަރު، މުހައްމަދު ޣައްސާން މައުމޫން
- ހޯމް މިނިސްޓަރު، އަލީ އިހްސާން
- އެޑިއުކޭޝަން މިނިސްޓަރު، އިސްމާއިލް ޝަފީއު
- ހެލްތު މިނިސްޓަރު، ޑރ. އަބްދުﷲ ޚަލީލް
- އެންވަޔަރަމެންޓް މިނިސްޓަރު ތޯރިގް އިބްރާހީމް
- ސިޓީސް، ލޯކަލް ގަވަމެންޓް މިނިސްޓަރު އާދަމް ޝަރީފް
- ޗީފް އޮފް ސްޓާފް، އަބްދުﷲ ފަޔާޒް
- ޗީފް އޮފް ޑިފެންސް ފޯސް، މޭޖަ ޖެނެރަލް އިބްރާހިމް ހިލްމީ
- ޕޮލިސް ކޮމިޝަނަރު އަބްދުﷲ ޝުޖާއު
އިއްޔެ މާލެއަށް ކުރި ވިއްސާރައިގައި މާލޭގެ 180 އަށް ވުރެން ގިނަ ގެއަށް ފެން ވަދެ، ރިޕޯޓްކޮށްފައިވެއެވެ. ހޯމަ ދުވަހުގެ 00:00ން ފެށިގެން ރޭގެ 00:00އަށް، ހޭދަވި 24 ގަޑިއިރަކީ މި ވޭތުވެދިޔަ 9 އަހަރުތެރޭގައި ރާއްޖެއަށް އެންމެ ބޯކޮށް ވާރޭ ވެހުނުކަމަށް ރެކޯޑްކޮށްފައިވާ 24 ގަޑިއިރެވެ.
