ބޯކޮށް ވާރޭވެހި ފެންބޮޑުވި ބައެއް ރަށްރަށަށް ރޯޑް ޑިވަލޮޕްމެންޓް ކޯޕަރޭޝަން (އާރުޑީސީ)ން އެހީތެރިކަން ފޯރުކޮށްދީފިއެވެ.
މި ކަމާ ގުޅިގެން އެކްސްގައި އާންމުކުރި ޕޯސްޓްތަކުގައި އާރުޑީސީން ބުނީ މި މަސައްކަތް އެ ކުންފުނިން ކުރަމުން ދަނީ މޯލްޑިވްސް ޕޮލިސް، މާލެ ސިޓީ ކައުންސިލް އަދި އެމްއެންޑީއެފްއާ ގުޅިގެންކަމަށެވެ. އަދި ފެންބޮޑުވުމާ ގުޅިގެން އެ ކުންފުނިން އެންމެ ބޮޑު އެހީތެރިކަމެއް ފޯރުކޮށްދިން ރަށްރަށުގެ ތެރޭގައި ހއ. އިހަވަންދޫއާއި ހދ. ކުޅުދުށްފުށި ހިމެނޭނެކަމަށް ވެސް އާރުޑީސީން ހާމަކޮށްފައިވެއެވެ. މި ރަށްރަށް ހިމެނޭހެން އާރުޑީސީގެ މުވައްޒަފުން މި ވަގުތު ތިބި ގިނަ ރަށްރަށަށް އެހީތެރިކަން ފޯރުކޮށްދިނުމުގެ ގޮތުން ވެލި އުފުލުމާއި ކޯރު ކޮނުމުގައި އާރުޑީސީގެ މުވައްޒަފުން ވަނީ ހަރަކާތްތެރިވެފައެވެ.
ކުޅުދުއްފުށި ސިޓީގެ ފެންބޮޑުވި ހިސާބުތަކުގައި ފެން ހިންދުމުގެ މަސައްކަތުގައި އާރުޑީސީގެ އިތުރުން އެ ރަށުގެ ސިޓީ ކައުންސިލާއި ވެމްކޯ ވެސް ބައިވެރިވެފައިވެއެވެ. ހަމައެހެންމެ އިހަވަންދޫގައި ފެންބޮޑުވި ހިސާބުތަކުގައި ފެން ހިންދުމުގެ މަސައްކަތުގައި އާރުޑީސީގެ އިތުރުން އެ ރަށުގެ ކައުންސިލުން ވެސް ބައިވެރިވެފައިވާކަމަށް އާރުޑީސީން ބުނެފައިވެއެވެ.
މާލެއަށް ބޯކޮށް ވާރޭވެހި ފެންބޮޑުވުމާ ގުޅިގެން ދިވެހި ފުލުހުންގެ ޚިދުމަތާއި މާލެ ސިޓީ ކައުންސިލާއި އެމްއެންޑީއެފުން ކުރި މަސައްކަތްތަކުގައި އާރުޑީސީން ވަނީ ބައިވެރިވެފައެވެ.
