ރައީސުލްޖުމްހޫރިއްޔާ އަދި އެމަނިކުފާނުގެ އާއިލާއަށް ސިހުރު ހެދިކަމަށް ތުހުމަތުކުރާ މައްސަލައިގައި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ޝަމްނާޒް ސަލީމުގެ މައްޗަށް ހެކި ނެތުމުން ދައުވާ ނުކުރަން ދައުލަތުން ނިންމައިފިއެވެ.
ދައުލަތުން ބުނެފައިވާ ގޮތުގައި ޝަމްނާޒްގެ މައްޗަށް ދައުވާކުރެވޭ މިންވަރަށް ދައުލަތަށް އެއްވެސް މިންވަރަކަށް ހެކި ލިބިފައި ނުވާތީވެ ދައުލަތުން ވަނީ މިމައްސަލައިގައި ޝަމްނާޒްގެ މައްޗަށް ދައުވާ ނުކުރުމަށް ނިންމާފައެވެ.
ރައީސް އަދި އެމަނިކުފާނުގެ އާއިލާއަށް ސިހުރު ހެދި ކަމުގެ ތުހުމަތުގައި ޝަމްނާޒް ހައްޔަރު ކޮށްފައި ވަނީ ޖޫން މަހުގެ 23 ވަނަ ދުވަހު އެވެ. ޝަމްނާޒްގެ އިތުރުން އޭނާގެ ކޮއްކޮވެސް ވަނީ މިމައްސަލަ އާއި ގުޅިގެން ހައްޔަރު ކޮށްފައެވެ. ނަމަވެސް ހުސްވި މަހުގެ 23 ވަނަ ދުވަހު ޝަމްނާޒް އާއި އޭނާގެ ކޮއްކޮ ވަނީ ބަންދުން ދޫކޮށްލާފަ އެވެ.
ސިހުރު ހެދި ކަމުގެ ތުހުމަތުގައި ޝަމްނާޒް ހައްޔަރު ކުރިއިރު އޭނާ ހުރީ އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރުގެ މަގާމުގައެވެ. ނަމަވެސް ފަހުން އޭނާ ވަނީ ސަސްޕެންޑް ކޮށްފަ އެވެ. އޭނާގެ ކުރީގެ ފިރިމީހާ އަދި ރައީސް އޮފީހުގެ މިނިސްޓަރު އާދަމް ރަމީޒު ވެސް މިމައްސަލަ އާއި ގުޅިގެން ވަނީ ސަސްޕެންޑް ކޮށްފައެވެ.
