ރާއްޖޭގެ މީހުން ދިރިއުޅޭ ރަށްރަށުގެ މަގުތަކުގައި ހަރުކޮށްފައިވާ މަގުބައްތިތައް ކަނޑައެޅިފައިވާ މިންގަނޑަށް ފެށްތުމަށްޓަކައި ދިން މުއްދަތު އިތުރުކޮށްފިއެވެ.
އެގޮތުން ރަށްރަށުގެ މަގުތަކުގައި ހަރުކޮށްފައިވާ ބައްތިތައް، ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) އިން ކަނޑައަޅާފައިވާ މިންގަނޑާއި އެއްގޮތަށް އިސްލާހު ކުރުމަށް އަންނަ އަހަރުގެ ފެބްރުއަރީ 25 ގެ ނިޔަލަށް މުއްދަތު އިތުރުކުރިކަން ފެނަކަ ކޯޕަރޭޝަނުން ނެރުނު އިއުލާނެއްގައި ވަނީ ބުނެފައެވެ.
ރާއްޖޭގެ 144 ރަށެއްގައި މަގުބައްތިތައް ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) އިން ކަނޑައަޅާފައިވާ ރައްކާތެރިކަމުގެ މިންގަނޑާއި ޚިލާފަށް ހުރި އިރު، އެކަން އިސްލާހު ކުރުމަށް ކުރިން ދެވުނު މުއްދަތުގައި ބައްތިތައް ރައްކާތެރިކަމުގެ މިންގަނޑާއި އެއްގޮތަށް އިސްލާހު ކުރުމުގައި ކައުންސިލްތަކަށް ގޮންޖެހުންތަކެއް ހުރިކަން ފެނަކައިން ވަނީ ފާހަގަކޮށްފައެވެ.
އެގޮތުން ފެނަކައިން ދީފައިވާ މުއްދަތު އިތުރުކޮށްފައިވަނީ، ރައީސުލްޖުމްހޫރިއްޔާގެ އޮފީހުގެ ލަފާގެމަތިން، ޔޫއާރުއޭ އިން ކުރިން ދީފައިވާ މުއްދަތު އިތުރު ކުރުމާއި ގުޅިގެން ކަމަށް އެ ކުންފުނީގެ ބަޔާނުގައި ވަނީ ބުނެފައެވެ.
ރައްޔިތުންގެ ސަލާމަތާއި ރައްކާތެރިކަމަށްޓަކައި، މިގޮތަށް އަމަލު ނުކުރާ ރަށްރަށުގެ މަގު ބައްތިތަކުން ކަރަންޓު ކަނޑާލުމަށް ނިންމާފައިވާ ކަމަށް އަންގާ، ފެނަކައިން މީގެ ކުރިންވެސް ތިން ފަހަރެއްގެ މަތިން ވަނީ ކައުންސިލްތަކަށް މުއްދަތު ދީފައެވެ.