ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި މިދިޔަ އަންގާރަ ދުވަހު މާލެއަށް ބޯކޮށް ވާރޭ ވެހި ފެންބޮޑުވުމުގެ ސަބަބުން ފެން ވަދެ ގެއްލުންވި މާލޭގެ 5 ގެއެއްގެ މީހުންނަށް ވަގުތީ ހިޔާވަހިކަން ފޯރުކޮށްދީފައިވާކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.
ވިއްސާރައިގެ ސަބަބުން ލިބުނު ގެއްލުންތައް ހާމަކުރަމުން އެ އިދާރާއިން ބުނެފައިވަނީ، ފެން ބޮޑުވުމުގެ ސަބަބުން މާލޭގެ 5 ގެޔެއްގައި ދިރިއުޅޭ 23 ފަރާތަކަށް ވަގުތީ ހިޔާވަހިކަން ފޯރުކޮށްދީފައިވާކަމަށާއި އަދިވެސް އެ ފަރާތްތަކަށް އެ އިދާރާގެ އެހީތެރިކަން ފޯރުކޮށްދެމުން އަންނަ ކަމަށެވެ.
އެމްޑީއެމްއޭއިން އެކްސް ގައި ކުރި ޕޯސްޓެއްގައި ބުނެފައިވަނީ:
- އެހީތެރިކަމަށް އެދި 256 ފަރާތަކުން ރިޕޯޓުކޮށްފައިވޭ
- ޖުމްލަ 248 ގޭގައި ވެލި ބަސްތާ ޖަހާފައިވޭ
- ނަޖިސް ފެން ބޭރުވެގެން 12 ގެއަކަށް އެހީތެރިކަން ފޯރުކޮށްދީފައިވޭ
- ފަސް އާއިލާއަކުން 23 މީހަކަށް ވަގުތީ ބޯހިޔާވަހިކަން ދީފައިވޭ
މީގެ އިތުރުން ޑިޒާސްޓަރ މެނޭޖްމަންޓް ސެންޓަރުން ވަނީ ރިޕޯޓުކޮށްފައިވާ ގެ ތަކުގެ ތެރެއިން އެސެސްމެންޓް ހަދަންޖެހޭ ގެތަކުގެ އެސެސްމަންޓް ހެދުމަށް ތައްޔާރުވެފައިވާކަމަށާއި އެ މަސައްކަތް މަޑު ޖެހިފައިވަނީ މޫސުން ގޯސްވުމުގެ ސަބަބުންކަމަގައި ހާމަކޮށްފައެވެ.
އެފަރާތްތަކަށް ވަގުތީ ހިޔާ ވަހިކަން ދީފައިވަނީ ތިން ދުވަހުގެ މުއްދަތަށް ކަމަށާއި، އެންޑީއެމްއޭ އިން މަސައްކަތް ކުރަމުން ދަނީ އެ ގެތައް ސާފުކުރުމުގެ މަސައްކަތް ނިންމާ ވީހާވެސް އަވަހަކަށް އެ އާއިލާތައް ގޭގެއަށް ބަދަލުކުރުމަށް މަސައްކަތް ކުރަމުން އަންނަކަމުގައިވެސް އެ އިދާރާއިން ހާމަކުރެއެވެ.
