ލޭނުގައި ޖެހި މަރުވެފައިވާ މިޔަރު ޕްރޮސެސް ކުރުމަށް ހާއްސަ ލައިސަންސެއް ދޫކުރާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެއްޖެއެވެ.
އެވުޒާރާއިން ވަނީ ލޭނު މަސްވެރިކަން ކުރުމުގެ ގަވާއިދުގެ ދެލިކޮޕީއަށް އާންމުންގެ ހިޔާލާއި ކޮމެންޓު ހޯދުމަށް ހުޅުވާލާފައެވެ. މިމަހުގެ 18 ވަނަ ދުވަހާއި ހަމައަށް މިގަވާއިދާއި މެދު އާންމުދެކޭ ގޮތް އީމެއިލް މެދުވެރިކޮށް fisheriesmanagement@fisheries.gov.mv ހުށަހެޅުމަށް އެވުޒާރާއިން ވަނީ އެދިފައެވެ.
އެވުޒާރާއިން ވިދާޅުވީ ލޭނު މަސްވެރިކަމުގައި ހިފޭ މިޔަރު އަދި މަސްވެރިކަމުގައި އަމާޒުނުކުރާ ބާވަތްތައް (ބައިކެޗް) ދުނިޔެ ގަބޫލުކުރާ ބެސްޓް ޕްރެކްޓިސްތަކާއި ހަމަތަކުގެ މަތިން އެއްގަމަށް ގެނެސް، މިޔަރުގެ ބާވަތްތައް ޕްރޮސެސްކުރުމުގެ ހުއްދަ އޮތް ފެސިލިޓީތަކުން ޕްރޮސެސްކުރުމުގެ ފުރުސަތު މި ގަވާއިދުގެ ދަށުން ފަހިވެގެން ދާނެ ކަމަށެވެ.
ނަމަވެސް މިފަދައިން ލައިސެންސްއެއް ދިނުމަކީ ރާއްޖޭގައި މިޔަރު މަސްވެރިކަން ކުރުމަށް ހުޅުވާލުން ނޫން ކަމަށާއި އަދި ހުޅުވާލުމުގެ ވިސްނުމުގައި ގައި އަޅާ ފިޔަވަޅެއްވެސް ނޫންކަމަށް އެ ވުޒާރާއިން ވަނީ ބުނެފައެވެ.
“ލޭނު މަސްވެރިކަން ކުރުމަށް ލައިސަންސް ކުރެވޭ އުޅަނދުފަހަރުތަކުގައި މިޔަރަށް އަމާޒުކޮށްގެން މަސްވެރިކަން ކުރުމަކީ މިގަވާއިދުގެ ދަށުން މަނާކަމެކެވެ. އަދި މިގަވާއިދު ފަރުމާކުރުމުގައި ލޭނު މަސްވެރިކަމުގައި ހިފޭ މިޔަރު ފަދަ މަސްވެރިކަމުގައި ހިފޭ ބައިކެޗް މަދުކުރުމުގެ ގޮތުން ކޮންމެހެން އަޅަންޖެހޭ ފިޔަވަޅުތައް ހިމެނިފައިވާނެއެވެ.”. އެ ވުޒާރާއިން ވިދާޅުވެފައި ވެއެވެ.
ގަވައިދުގައި ބައިކެޗްގެ ގޮތުގައި ހިފޭ މިޔަރު މަދުކުރުމުގެ ގޮތުން އުޅަނދުގައި ބޭނުންކުރާ ލޭނުކޮޅު (ބްރާންޗް ލައިން) ގެ މިޔަވާލި (ލީޑަރ) ގެ ގޮތުގައި ވަޔަރު ނުވަތަ ނަރު (ވަޔަރ ޓްރޭސް) ބޭނުންކޮށްގެން ނުވާނެ ކަމަށް ހިމަނާފައިވާނޭ ކަމަށެވެ. މީގެ އިތުރުން، ލޭނުކޮޅުގައި ޖެހޭ މިޔަރުގެ ތެރެއިން ލޭނު ނަގާއިރު މަރުނުވެ އޮންނަ މިޔަރު ވީހާވެސް އަވަހަށް ދޫކޮށްލަންވާނެ ކަމަށް ގަވާއިދުގައި ހިމަނާފައިވާނެ އެވެ. އަދި އެފަދައިން މިޔަރު ދޫކޮށްލާ ހާލަތުގައި މިޔަރަށް ލިވޭ އަނިޔާ ކުޑަކުރުމަށްޓަކައި ބުޅި ނައްޓާ އާލާތް (ޑީ-ހުކަރ) އަދި ލޭނުކޮޅު ބުރި ކުރާ އާލާތް (ލައިންކަޓަރ) ބޭނުންކޮށްގެން މިޔަރުގެ އަނގައާ ނުވަތަ ބުޅިއާ ވީހާވެސް ކައިރިން ނަނު ބުރިކޮށްލަން ވެސް ގަވާއިދުގައި ހިމަނާފައިވާނެއެވެ.
“މިއާލާތްތައް ހުރިހާ ވަގުތެއްގައިވެސް އުޅަނދުގައި ހުންނަންޖެހޭނެ ކަމަށް ގަވާއިދުގައި ބަޔާންކޮށްފައިވާނެ، މީގެއިތުރުން، ލޭނުކޮޅުގައި ޖެހޭ މިޔަރުގެ ތެރެއިން ލޭނު ނަގާއިރު މަރުވެފައިވާ މިޔަރު ބަނދަރަށްގެންނައިރު ހުންނަންވާނީ މިޔަރުގެ އެއްވެސް އުރަހައެއް އޭގެ ހަށިގަނޑުން ވަކިނުކޮށް. މިއީ ދުނިޔޭގެ ފެންވަރުގައި ބަލައިގަނެފައިވާ ލޭނު މަސްވެރިކަމުގެ ބެސްޓް ޕްރެކްޓިސް.”. އެ ވުޒާރާއިން ވިދާޅުވެފައި ވެއެވެ.
ދުނިޔޭގެ ކާބޯތަކެއްޗާ ބެހޭ ޖަމްޢިއްޔާ ކަމުގައިވާ އެފްއޭއޯ އިން ޝާއިއުކޮށްފައިވާ ކޯޑް އޮފް ކޮންޑަކްޓް ފޯ ރެސްޕޮންސިބަލް ފިޝަރީޒް، އަދި މިނޫންވެސް ދެމެހެއްޓެނިވިކޮށް މަސްވެރިކަން ރާވައި ހިންގައި ބެލެހެއްޓުމަށް ލަފާދޭ އެހެނިހެން ބައިނަލްއަޤްވާމީ ޖަމްޢިއްޔާތަކުން ކަނޑައަޅާފައިވާ އިރުޝާދުތަކަށް ރިއާޔަތްކޮސް ލޭނު މަސްވެރިކަމުގައި ހިފޭ ބައިކެޗްގެ އިސްރާފު ކުޑަކުރުމަށްޓަކައި ލޭނުގައި ޖެހި މަރުވެފައިވާ މިޔަރު އެއްގަމަށް ގެނެސް، މިޔަރު ޕްރޮސެސްކުރުމަށް ހާއްސަ ލައިސެންސެއް ދޫކުރާނެ ކަމަށް އެވުޒާރާއިން ވިދާޅުވި އެވެ.
