ރާއްޖެ އައި މީހެއްގެ ލަގެޖުން ނުވަ މިލިއަން ރުފިޔާގެ މަސްތުވާތަކެތި އަތުލައިގަނެފި ކަމަށް މޯލްޑިވްސް ކަސްޓަމްސް އޮތޯރިޓީން ބުނެފިއެވެ.
ކަސްޓަމްސް އޮތޯރިޓީން މިއަދު ހާމަކޮށްފައިވާ ގޮތުގައި މިމަހުގެ 11 ވަނަ ދުވަހު ރާއްޖެ އައި ނެދަލެންޑްސް މީހެއްގެ ލަގެޖުން 6 ކިލޯގެ މަސްތުވާތަކެތީގެ ބާވަތެއް ކަމުގައިވާ ކެތިނޯން ވަނީ އަތުލައިގަނެފަ އެވެ.
އަތުލައިގަނެފައިވާ މަސްތުވާތަކެތީގެ ޖުމްލަ ބަރުދަނުގައު 6.070 ކިލޯގްރާމް ހުރިކަމަށާއި އެ ތަކެތީގެ މަގުމަތީ އަގު9,105,000.00 (ނުވަ މިލިއަން އެއްލައްކަ ފަސް ހާސް) ދިވެހި ރުފިޔާއަށް އަރާނެ ކަމަށް ވެސް ކަސްޓަމްސް އިން ވަނީ ބުނެފައެވެ.
ކަސްޓަމްސް އިން ވިދާޅުވީ މި ތަކެތި ފެނިފައި ވަނީ މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވޭ 30 އަހަރުގެ ނެދަލެންޑްސްގެ ފިރިހެން ފަސިންޖަރެއްގެ ލަގެޖުންނެވެ. އޭނާ ރާއްޖެ އައިސްފައި ވަނީ ގަތަރުގެ ދޯހާއިން ކަމަށާއި މިމައްސަލަ މިހާރު ތަހުގީގު ކުރުމަށް އަތުލައިގަތް މަސްތުވާތަކެއްޗާއި ނެދަލެންޑްސްގެ ފަސިންޖަރާއި އެކު ފުލުހުންނާއި ހަވާލުކޮށްފައިވާ ކަމަށް ކަސްޓަމްސް އިން ވަނީ ބުނެފައެވެ.
