ކުރީ ސަރުކާރުގައި ޖެންޑާ މިނިސްޓްރީގެ ސްޓޭޓު މިނިސްޓަރުކަން ކުރެއްވި ޒިފްލީނާ ހަސަން 3.5 މިލިއަން ރުފިޔާއަށް ފެލްޓް ގަތް މައްސަލައިގައި ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވުމަށް އެންޓި ކޮރަޕްޝަން ކޮމިޝަނުން ނިންމައިފި އެވެ.
އެކޮމިޝަނުން މިމައްސަލަ ތަހުގީގު ކުރުމަށްފަހު، ދައުވާ ކުރުމާއި މެދު ގޮތެއް ނިންމުމަށް ޕީޖީ އޮފީހަށް ފޮނުވާފައިވާ ކަމަށް އޭސީސީގެ އޮފިޝަލަކާއި ހަވާލާދީ ރާއްޖޭގެ އޮންލައިން ނޫހެއް ކަމަށްވާ “ވަގުތު ނޫހުން” ވަނީ ރިޕޯޓް ކޮށްފައެވެ.
މިމައްސަލަ އާއި ގުޅޭ ތަފްސީލް އަދި އޭސީސީއިން އަދި ޕީޖީ އިން ވެސް ހުށަހަޅާފައެއް ނުވެއެވެ.
ޒިފްލީނާ ހުޅުމާލެއިން ފްލެޓެއް ގަތް މައްސަލަ ދިވެހި ފުލުހުންގެ އިދާރާއިން އޭސީސީއަށް ފޮނުވާފައި ވަނީ ހުސްވި މަހުގެ 14 ވަނަ ދުވަހު އެވެ. ޒިފްލީނާ ފްލެޓެއް ގަނެ، މިމައްސަލަ ކަމާބެހޭ އިދާރާތަކަށް ހުށަހެޅުނުތާ ގިނަދުވަހެއް ނުވަނީސް އޭނާގެ ދަރިފުޅުގެ ނަމުގައި އާރްސީސީ އިން ހުޅުމާލޭގައި ތަރައްގީ ކުރި ބްލޫ ހެވަން ރެސިޑެންސްއިން 3.8 މިލިއަން ރުފިޔާއަށް ފްލެޓެއް ގަތް މައްސަލަ ވެސް ވަނީ ފެންމަތިވެފަ އެވެ.
