ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ހިންގުން ވަގުތީ ގޮތުން ކުޅިވަރާ ބެހޭ ޤައުމީ މަޖިލީހާ ހަވާލުކޮށްފިއެވެ.
މި ކަން ހާމަކުރައްވައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވަނީ އެކްސްގައި ޕޯސްޓެއް އާންމުކުރައްވާފައެވެ. ޠަލާލް ވިދާޅުވީ މި ނިންމުން އިއްޔެ ވާނީ ކުޅިވަރާ ބެހޭ ގައުމީ މަޖިލީހަށް އަންގަވާފައިކަމަށެވެ.
ބެޑްމިންޓަން އެސޯސިއޭޝަންގެ އައު ހިންގާ ކޮމިޓީ އިންތިޚާބު ކުރުމަށްޓަކައި ކުރަންޖެހޭ މަސައްކަތްތައް މިހާރު ފަށާފައިވާކަމަށް ވެސް ޠަލާލް ވިދާޅުވެފައިވެއެވެ.
އެ އެސޯސިއޭޝަންގެ ހިންގާ ކޮމިޓީގެ މުއްދަތު ހަމަވެފައި އޮންނަތާ ފަސް މަހަށް ވުރެ ގިނަ ދުވަސް ވެދާނެއެވެ. ބެޑްމިންޓަން އެސޯސިއޭޝަނުން އިންތިޚާބު ބާއްވަން އިއުލާނު ކުރުމުން، އެ އިންތިޚާބުގެ ކަންކަން މަޑުޖައްސާލަން ޠަލާލް ވަނީ މީގެ ކުރިން 3 ފަހަރެއްގެ މަތިން އަންގަވާފައެވެ. އަދި މި އަހަރުގެ ކުރީ ކޮޅު ބޭއްވުނު ބައްދަލުވުމަކަށްފަހު، އެ އިންތިޚާބުގެ ކުރިން އެ އެސޯސިއޭޝަންގެ ހިންގާ ގަވާއިދުގައި ހުރި މައްސަލަތަކަށް ހައްލު ހޯދައި، ލަފާދީފައިވާ ބަދަލުތައް ގެންނަން ޖެހޭކަމަށް ވެސް ޠަލާލް ވަނީ އަންގަވާފައެވެ.
