މާލޭގެ ބައެއް މަގުމަތުގެ ކަންމަތިތަކުގައި ‘ރެޑްލައިން’ ދަމައި، އެ ލައިންތަކުގެ މަތީގައި ޕާކުކުރާ އުޅަނދުތައް ޓޯ ކުރުމަށް ނިންމާފައިވާކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ އިއްޔެ ބޭއްވި ނޫސްވެރިންގެ ބައްދަލުވުމެއްގައެވެ. މި ނޫސްވެރިންގެ ބައްދަލުވުމުގައި އާޒިމް ވިދާޅުވީ މަގުތަކުގެ ކަންމަތީގައި ޕާކު ކުރުމަކީ މަނާ ކަމެއްކަމަށެވެ. އަދި އެ އަމަލު ކުރާ މީހުންގެ ސަބަބުން މާލޭގައި ދިރިއުޅޭ އެންމެންނަށް އުނދަގޫވާކަމަށް އާޒިމް ވިދާޅުވިއެވެ. އާޒިމް ފާހަގަ ކުރެއްވި ގޮތުގައި މި ފަދަ އަމަލުތައް ހުއްޓުވުމަށް މުޅި މާލޭގައި ‘ރޮނގު’ ދެމުމަކީ ކައުންސިލަށް ފަސޭހަ ކަމެއް ނޫނެވެ. އަދި އެ ފަދަ ސައިކަލުތައް ޓޯ ކުރުމަކީ ފުލުހުންނަށް ވެސް ފަސޭހަ ކަމެއް ނޫނެވެ.
މާލެއަށް ކުރިމަތިވެފައިވާ ޓްރެފިކް އަދި ޕާކިންގ މައްސަލަތަކަށް އަވަސް ހައްލެއް ހޯދުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއިން އިސްނަގައިގެން ކަމާގުޅުންހުރި މުއައްސަސާތަކުގެ މެދުގައި އިއްޔެ ވަނީ މަޝްވާރާ ބައްދަލުވުމެއް ކުރިއަށްގެންގޮސްފައެވެ. އެ ބައްދަލުވުމުގައި ވެހިކަލް ކޮންޖެސްޝަން މައްސަލަ ހައްލުކުރުމަށް ކުރެވެން ހުރި މަސައްކަތްތަކާއި ދިމާވާ ގޮންޖެހުންތަކާ ގުޅޭގޮތުން ވަނީ މަޝްވަރާކުރެވިފައެވެ.
އާޒިމްގެ އިތުރުން ދާޚިލީ ސަލާމާތާއި ފަންނިއްޔާތާއިބެހޭ ވަޒީރު ޢަލީ އިހުސާނާއި، ޕޮލިސް ކޮމިޝަނަރ އަލީ ޝުޖާއުއާއި، ހައުސިންގ ޑިވެލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު އަދި ދަތުރުފަތުރާއި މަދަނީ އުދުހުންތަކާ ބެހޭ ވަޒީހު މުޙައްމަދު އަމީން ވެސް ބައިވެރިވެވަޑައިގެންފައިވެއެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަމީން ވިދާޅުވީ، ރެޑްލައިން މަތީގައި ޕާކުކުރާ ފަރާތްތަކާ މެދު އަޅުއްވާނެ ފިޔަވަޅާ މެދު މިހާރު މަޝްވަރާ ކުރެވެމުންދާކަމަށާއި، ނިންމަވާ ގޮތެއް ވަރަށް އަވަހަށް އާންމު ކުރައްވާނެކަމަށެވެ. ހަމައެހެންމެ މަގުތަކުގައި ހިނގާ މީހުންނަށް، 4 ފުރޮޅުލީ އުޅަނދު ޕާކު ކުރާ ފަރާތްތަކުގެ ސަބަބުން ދިމާވާ ދަތިތައް ހައްލުކުރުމަށް ދުވާރުތަކުގެ އަރިމަތީގައި ބޮލާޑް ޖެހުމުގެ މަސައްކަތް ވެސް ކުރަމުން އަންނަކަމަށް އަމީން ވިދާޅުވިއެވެ.
މާލޭގެ މަގުތަކުގެ ދުވާރުތަކުގެ މަތީގައި 4 ފުރޮޅުލީ އުޅަނދު ޕާކު ކުރުމުގެ މައްސަލަ ހުއްޓުވުމަށްޓަކައި މާލެ ސިޓީ ކައުންސިލުން ދުވާރުތަކުގައި ބޮލާޑް ޖެހުމުގެ މަސައްކަތް މިދިޔަ ޖޫމް މަހު ވެސް ވަނީ ކޮށްފައެވެ. އެގޮތުން ސަލްޓަންޕާކު ކުރިމަތީގައި އޮންނަ ދުވާރުމަތީ އަދި ލޮނުޒިޔާރަތް މަގުގައި ބޮލާޑް ޖެހުމުގެ މަސައްކަތް ކައުންސިލުން އޭރު ވަނީ ކޮށްފައެވެ.
