މާލެ ސަރަހައްދުގައި ދުއްވާ ޓެކްސީތައް ޕާކުކުރުމަށް ޚާއްޞަ ޕާކިން ޒޯނުތަކެއް ގާއިމުކުރުމަށް ނިންމާފައިވާކަން ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ހާމަކޮށްފިއެވެ.
އެ މުޒާރާއިން މި ކަން ހާމަކޮށްފައިވަނީ އިއްޔެ ބޭއްވި ނޫސްވެރިންގެ ބައްދަލުވުމެއްގައެވެ. އެ ބައްދަލުވުމުގައި ވާހަކަފުޅުދައްކަވަމުން ދަތުރުފަތުރާއި މަދަނީ އުދުހުންތަކާ ބެހޭ ވަޒީހު މުޙައްމަދު އަމީން ވިދާޅުވީ މާލެ ސަރަހައްދުގައި ގާއިމުކުރުމަށް ނިންމާފައިވާ ޕާކިން ޒޯންތައް ބިނާކުރާނެ ސަރަހައްދުތައް ކުރިއަށް އޮތް ދެ ހަފުތާގެ ތެރޭގައި ކަނޑައަޅަން ފަށާނެކަމަށެވެ. އަދި ޓެކްސީތައް ޕާކުކުރުމަށް ޚާއްޞަ ވަކި ޒޯނެއް ވެސް މި ސަރަހައްދުތަކުގެ ތެރޭގައި ހިމަނުއްވާނެކަމަށް އަމީން ވިދާޅުވިއެވެ.
“ޓެކްސީތަކަށް، ޓެކްސީ ހިދުމަތްދޭ ފަރާތްތަކަށް ކުޑަވަގުތަކަށް ޕާކު ކުރެވޭނެ ވަކި ތަންތަން ހަމަޖެއްސޭތޯ، އެ ތަންތަން ވެސް ހަމަޖައްސާނަން މާލެއާއި ހުޅުމާލޭގައި ވެސް. އޭރުން އެ ބޭފުޅުންނަށް ވެސް ފަސޭހަ ވާނެ،” އަމީން ވިދާޅުވިއެވެ.
މާލެ އަދި ހުޅުމާލޭގައި ހުރި ހުސް ބިންތައް ވަގުތީ ޕާކިން ސަރަހައްދުތަކުގެ ގޮތުގައި ބޭނުންކުރުމަށް ކުރެވެން ހުރި ކަންކަމާ ގުޅޭގޮތުން ވެސް މަޝްވަރާތަކެއް ކުރެވިފައިވާކަން އަމީންގެ ވާހަކަފުޅުގައި ވަނީ ފާހަގަކުރައްވާފައެވެ.
ހުޅުމާލޭގައި 15 ޕާކިންގް ބިލްޑިންގް އެޗްޑީސީގެ ދަށުން ތަރައްޤީކުރުމުގެ މަސައްކަތް ވަރަށް އަވަހަށް ފަށާނެކަމަށް އެޗްޑީސީން ވެސް އިއްޔެ ވަނީ ބުނެފައެވެ.
