ތައިލެންޑްގެ ބޮޑު ވަޒީރު ކަމުގެ މަގާމަށް އެގައުމުގެ ކުރީގެ ބޮޑު ވަޒީރު އަދި ބިލިއަނަރު ތަކްސިންގެ ދަރިކަނބަލުން ޕެޓޮންގްޓާން ޝިނާވަތުރާ އައްޔަންކޮށްފި އެވެ.
އެގައުމުގެ ގާނޫނު ހަދާ މަޖިލީހުގައި ބޮޑުވަޒީރަކު ހޮވުމަށް މިއަދު ނެގި ވޯޓުގައި ޕެޓޮންގްޓާންއަށް ވަނީ 319 ވޯޓު ލިބިފައިވާއިރު، އޭނާއާއި ދެކޮޅަށް 145 ވޯޓު ވަނީ ލިބިފަ އެވެ.
އުމުރުން 37 ޕެޓޮންގްޓާންއަކީ ތައިލެންޑްގެ އެންމެ ހަގު ބޮޑު ވަޒީރެވެ. އަދި ފާއިތުވި ޝިނާވަތްރާ ދަރިކޮޅުން ފާއިތުވި ދެގަރުނުގެ ތެރޭގައި ތައިލެންޑްގެ ވެރިކަން ކުރެއްވި ހަތަރުވަނަ މެންބަރެވެ. އޭނާގެ ކުރިން ބޮޑުވަޒީރުކަން ކުރެއްވި ބައްޕަ ތަކްސިންއާއި ދައްތަ ޔިންގްލަކް ހިމެނޭ ގޮތަށް ތިން މީހުން ވެރިކަމުން ދުރުކުރީ އަސްކަރީ ބަޣާވާތްތަކުން ނުވަތަ ދުސްތޫރީ ކޯޓުތަކުގެ ހުކުމްތަކުންނެވެ.
ޕެޓޮންގްޓާން ތައިލެންޑްގެ ބޮޑު ވަޒީރުގެ މަގާމަށް އައްޔަންކޮށްފައި ވަނީ އޭނާގެ ކުރީގެ ބޮޑުވަޒީރު ސްރެތާ ތަވިސިން ޖަލުގައި ހުރި ކުރީގެ ވަކީލަކު އޭނާގެ ކެބިނެޓަށް އައްޔަންކުރުމާއި ގުޅިގެން އެގައުމުގެ އެންމެ އިސް ކޯޓުން އޭނާ ބޮޑުވަޒީރު ކަމުގެ މަގާމުން ދުރުކުރުމުންނެވެ.
