ރާއްޖޭގައި އާންމުން އާންމުގޮތެއްގައި އާއިލާތަކާއި، ރައްޓެހިން އަދި އޮފީސް ގުޅުންތަކަށް ބޭނުން ކުރަމުން އަންނަ އެޕްލިކޭޝަން، ވައިބާ ހެކް ކުރުން އިތުރުވެފައިވާތީ އެ ކަމަށް ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.
ފުލުހުން އިއްޔެ އެކްސްގައި އާންމު ކުރި ޕޯސްޓެއްގައި ފޯނަށް އަންނަ އޯޕީޑީ ނުވަތަ ވެރިފިކޭޝަން ކޯޑު އެހެން ފަރާތްތަކާ ހިއްސާ ނުކުރުމަށް އެދިފައިވެއެވެ. މީގެ އިތުރުން މީހަކަށް ފައިސާ ފޮނުވުމުގެ ކުރިން، ފައިސާ ފޮނުވެނީ ކާކަށްކަން ކަށަވަރުކުރުމަށް ވެސް ފުލުހުން އެދިފައިވެއެވެ.
މި ފަދަ ގޮތަކުން ފައިސާ ފޭރެން އުޅޭކަމަށް ޝައްކު ކުރެވިއްޖެ ނަމަ ލަސްނުކޮށް ފުލުހުންނަށް މައްސަލަ ރިޕޯޓު ކުރުމަށް ފުލުހުން އެދިފައިވެއެވެ.
ފަހަކަށް އައިސް ވައިބާ ހެކްކޮށް، އާއިލާ މީހުންނަށް މެސެޖް ފޮނުވައިގެން ރުފިޔާ ފޭރޭ ދިވެހިންގެ އަދަދު ގިނަވެފައިވާކަން ފާހަގަކޮށްލެވެއެވެ. އެ ފަދަ ފަރާތްތަކުން ފޮނުވާ ލިންކުތަކަށް ނުފިތުމަށް ފުލުހުން ގެންދަނީ އެކި ފަހަރުމަތިން އެދެމުންނެވެ.
