ލޭނު އަޅައިގެން މަސްވެރިކަން ކުރަން ހުއްދަ ދިނުމުގެ ސަބަބުން އެކަމުގެ ގެއްލުން ފަތުރުވެރިކަމަށް ވަރަށް ބޮޑަށް ކުރާނެ ކަމުގައި ކުރީގެ ރައީސް މުޙައްމަދު ނަޝީދު ވިދަޅުވެއްޖެއެވެ.
ރާއްޖޭގައި ބޮޑު ކަންނެލީގެ ލޭނު މަސްވެރިކަން ކުރުމުގެ ހުއްދަ ދިނުމަށް މިދިޔަ މާރޗް މަހުގެ ތެރޭގައި ވަޒީރުންގެ މަޖިލިހުން ވަނީ ފާސްކޮށްފައެވެ.
އެކަމާއި ގުޅިގެން ލޭނު މަސްވެރިކަން ގުޅުމުގެ އުސޫލެއް މިހާރު ފިޝަރީޒް މިނިސްޓްރީން މިހާރު އެކުލަވާލައިފައި ވާއިރު، އެކަމާއި ގުޅިގެން ރާއްޖޭގެ ގިނަ އަދަދެއްގެ މަސްވެރިން އަންނަނީ ނުރުހުން ފާޅުކުރަމުންނެވެ.
މިކަމާއި ގުޅިގެން ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ ލޭނު މަސްވެރިކަމަކީ ގިނަ އަދަދެއްގެ އެންމަޑިޔާއި ކޯމަހާއި ދޫނި އަދި މިޔަރުފަދަ ތަކެތި ދަލުގައި ޖެހި މަރުވާކަމެއްކަމަށާއި އެކަމުގެ ސަބަބުން ފަތުރުވެރިކަން ހަލާކުވެގެންދާނެ ކަމަށެވެ.
ލޭނު މަސްވެރިކަން ކުރުމުގެ ގަވާއިދުގެ ދެލިކޮޕީއަށް އާންމުންގެ ހިޔާލާއި ކޮމެންޓު ހޯދުމަށް އެ ވުޒާރާއިން މިހާރު ހުޅުވައިލާފައިވާއިރު، މި ގަވާއިދުގެ ދެލިކޮޕީއަށް ހިޔާލު ހުށަހެޅުމުގެ ފުރުސަތު މި މަހުގެ 18 ވަނަ ދުވަހުގެ ނިޔަލަށް ހަމަވާނެއެވެ.