ހަލުވި ދުވެއްޔެއްގައި ދެމެހެއްޓެނިވި ތަރައްގީގެ ލަނޑުދަނޑިތައް ހާސިލް ކުރަން ބޭނުން ކަމުގައިވާނަމަ ގްލޯބަލް ސައުތު އާއި އެ ނޫން ގައުމުތަކުގެ މެދުގައި އޮންނަ ގުޅުން ހަރުދަނާ ކުރަންޖެހޭ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
އިންޑިއާ ސަރުކާރުން ބާއްވާފައިވާ ވޮއިސް އޮފް ގްލޯބަލް ސައުތު ސަމިޓްގެ ޚާރިޖީ ވަޒީރުންގެ ބައްދަލުވުމުގައިވާ “ޗާޓިން އަ ނިއު ޕެރެޑައިމް ފޮރ ގްލޯބަލް ސައުތު” ޝިއާރުގެ މައްޗަށް ތަގުރީރު މިނިސްޓަރ އޮފް ފޮރިން އެފެއާޒް މޫސާ ޒަމީރު ވަނީ ތަގްރީރު ކުރައްވައިފައެވެ.
މިނިސްޓަރުގެ ތަގްރީރުގައި، އެމަނިކުފާނު ވަނީ 2023 ވަނަ އަހަރު ގްރޫޕް އޮފް 20 (ޖީ20)ގެ ރިޔާސަތުގައި އިންޑިއާ އިން އަދާކުރި ފުރިހަމަ ދައުރާއި އިންޑިއާގެ އިސްނެގުމުގެ ދަށުން ތައާރަފްކުރި މުހިންމު ހަރަކާތްތައް ފާހަގަކޮށް މަރުހަބާ ދަންނަވާފައެވެ. އަދި އިންޑިއާއިން ބާއްވާ މިހަރަކާތްތަކުގެ ސަބަބުން ޖީ20 ގައި ހިމެނޭ އަދި ނުހިމެނޭ ގައުމުތަކަށް ލިބޭ މަންފާ ފާހަގަކުރައްވާ ޝުކުރު ދެންނެވި އެވެ.
ގްލޯބަލް ސައުތުގެ ގައުމުތަކަށް މިހާރު ދިމާވަމުންދާ ގޮންޖެހުންތަކުގެ މައްޗަށް އަލިއަޅުވާލައްވާ މިނިސްޓަރު ވިދާޅުވީ އެ ގޮންޖެހުންތަކަށް ދާއިމީ ހައްލެއް ހޯދޭނީ މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތަކަށާއި، ދަރަނި އިތުރުވުމުގެ މައްސަލައާއި މަލްޓިލެޓްރަލް ފްރޭމްވޯރކްތަށް އަދާހަމަކޮށްގެން ކަމަށެވެ.
މިނިސްޓަރުގެ ތަގުރީރުގައި މިވަގުތަކީ ތަރައްގީވަމުން އަންނަ ކުދި ޖަޒީރާ ގައުމުތަކާއި، ގްލޯބަލް ސައުތު އާއި، މުޅި ދުނިޔެ މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތަކަށް ބޭނުންވާ ހައްލު ހޯދަންވީ ވަގުތުކަމުގައި ވެސް މިނިސްޓަރު ފާހަގަކުރެއްވިއެވެ.
ރާއްޖެ ފަދަ ގައުމުތަކުގެ ތަރައްގީގެ ތަސައްވަރު ހާސިލުކުރުމަށް ބޭނުންވާ ޓެކްނޮލޮޖީގެ އާ އީޖާދަތައް ހަމަހަމަ އުސޫލެއްގެ މަތިން ގްލޯބަލް ސައުތުގެ ގައުމުތަކަށް ފޯރާކަން ކަށަވަރުކުރުމުގެ މުހިންމުކަމުގެ މައްޗަށްވެސް މިނިސްޓަރު ވަނީ އަލިއަޅުވާލާފައި މިނިސްޓަރު ވިދާޅުވީ ހަލުވި ދުވެއްޔެއްގައި ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުރެވޭނީ ގްލޯބަލް ސައުތު އާއި އެ ނޫން ގައުމުތަކުގެ މެދުގައި އޮންނަ ގުޅުން އިތުރަށް ހަރުދަނާކޮށްގެން ކަމަށެވެ.
