ސްޓޭޓް އިލެކްޓރިކް ކޮންޕެނީ އާއި ގުޅިގެން ކަރަންޓްގެ ހިދުމަތްތަކަށް އިންވެސްޓްކޮށް އެ ހިދުމަތް ފުޅާ ކުރަން ޝައުގުވެރިވާ ފަރާތްތައް ހޯދުމަށް އިއުލާން ކޮށްފި އެވެ.
ސްޓެލްކޯއިން ހުސްވި ހަފްތާ އިއުލާން ކޮށްފައި ވަނީ ބިންމަތީގައި އާއި ފުރާޅުގައި ސޯލާ ޕެނަލް ހަރުކޮށްގެން ކަރަންޓު ދިނުމާއި، މޫދާއި ކަނޑުމަތީގައި ގާއިމު ކުރާ ނިޒާމުތަކުން ކަރަންޓު ދޭން ޝައުވެރިވާ ފަރާތްތަކުން، ކޮންޓްރެކްޓާ ފައިނޭންސް އުސޫލުން ނުވަތަ ހަކަތަ ވިއްކުމާ ބެހޭ އެއްބަސްވުމެއްގެ ދަށުން ސްޓެލްކޯއަށް ކަރަންޓު ވިއްކާނެ ފަރާތެއް ހޯދުމަށެވެ.
މީގެއިތުރުން، އިޔާދަކުރަނިވި ހަކަތަ ފޯރުކޮށްދިނުން ހަރުދަނާ ކުރުމަށްޓަކައި އެނާޖީ މެނޭޖުމަންޓް ސިސްޓަމާއި، ބެޓެރި އެނާޖީ ސްޓޯރޭޖް ސިސްޓަމް ގާއިމު ކޮށްދޭނެ ފަރާތްތައް ހޯދުމަށާއި ރަށްރަށުގައި ކަރަންޓް ވިއުގަ ގާއިމު ކުރުމަށާއި، އިންޖީނުގެ އެޅުމަށާއި ސަބްސްޓޭޝަންތައް އިމާރާތްކުރުމާއި ސަބްސްޓޭޝަނަށް ބިމުގައި ވަޅުލާ ކޭބަލް އެޅާނެ ފަރާތެއް ހޯދުމަށް ވެސް ވަނީ އިއުލާން ކޮށްފައެވެ.
މިހިދުމަތްތައް ފޯރުކޮށްދިނުމަށް ޝައުގުވެރިވާ ފަރާތްތަކުން މިއަހަރުގެ ޑިސެމްބަރު މަހުގެ 30 ވަނަ ދުވަހުގެ ނިޔަލަށް ފުރުސަތު އޮތް ކަމަށް އެކުންފުނިން ބުނެފައިވެ އެވެ.
މީގެއިތުރުން، ޝައުގުވެރިވާ ފަރާތްތަކުން ޕްރޮޕޯޒަލް ހުށަހެޅުމުގެ ކުރިން ޝައުގުވެރިކަން ފާޅުކުރުމާއި އިވެލުއޭޓް ކުރުމުގެ މަރުހަލާއެއް ކުރިއަށްދާނެ ކަމަށާއި އެއްބަސްވުމުގައި ސޮއިކުރުމުގެ ކުރިން އަގާމެދު މަޝްވަރާ ކުރެވޭނެ ކަމަށްވެސް އެކުންފުނިން ބުނެފައިވެ އެވެ.
