ލ. ގަމުން ހެރޮއިން އަދި ބޮގަރު ކަމަށް ޝައްކުކުރެވޭ ތަކެއްޗާއިއެކު ދެ މީހަކު ހައްޔަރުކޮށްފިއެވެ.
ފުލުހުން ބުނެފައިވާ ގޮތުގައި، ފުލުހުންގެ އިންޓެލިޖެންސްއަށް ލ. ގަން، ތުނޑި، ވިލެޖް ގޭގައި މަސްތުވާތަކެތި ގެންގުޅެ ވިޔަފާރި ކުރާ ކަމަށް އޮގަސްޓު 16 ވަނަ ދުވަހު މައުލޫމާތު ލިބުމުން ކޯޓު އަމުރެއްގެ ދަށުން އެގޭ ބަލާ ފާސްކޮށްފައިވާ ކަމަށެވެ.
އެގޮތުން އެގޭ ބަލާ ފާސް ކުރުމުން 24.42 ގުރާމްގެ ހެރޮއިން ކަމަށް ޝައްކުކުރެވޭ މަސްތުވާތަކެއްޗާއި ބޮގަރު ކަމަށް ޝައްކުކުރެވޭ 2 ރުނބާ އަދި 5 ލީޓަރުގެ ފުޅިޔެއްގެ އިތުރުން ބޮގަރު ކައްކަން ބޭނުން ކުރާ ތަކެތި ފެނިފައިވާ ކަމަށް ފުލުހުން ވަނީ ބުނެފައެވެ.
މިމައްސަލަ އާއި ގުޅިގެން 42 އަހަރުގެ އަދި 57 އަހަރުގެ ދެފިރިހެނުން ހައްޔަރުކޮށްފައިވާ ކަމަށާއި މިމައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ.
މަސްތުވާތަކެތީގެ މައްސަލަ ހައްލު ކުރުމަކީ ރައީސް ޑރ. މުޢިއްޒުގެ ވައުދުފުޅެކެވެ. އެގޮތުން ހޯމް މިނިސްޓްރީން ވަނީ މަސްތުވާތަކެތީގެ މައްސަލާއިގައި މަސަރުކާރުން ގެންގުޅެނީ “ޒީރޯ ޓޮލެރެންސް” ގެ ސިޔާސަތެއް ކަމަށެވެ.
މަސްތުވާތަކެތީގެ މައްސަލަ ހައްލު ކުރުމަށް ހޯމް މިނިސްޓްރީން ވަނީ މަސްތުވާތަކެއްޗާއި ބެހޭ ގާނޫނަށް އިސްލާހު ގެންނަން ނިންމާ، ބިލް ޑްރާފްޓް ކުރުމަށްފަހު އެޓާނީ ޖެނެރަލްގެ އޮފީހަށް ފޮނުވާފައެވެ. އެގޮތުން އެބިލުގައި 500 ގްރާމްއަށް ވުރެއް ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމުގެ އިތުރުން ކޯޓު އަމުރަކާއި ނުލާ ތަންތަން ބަލާ ފާސް ކުރުމުގެ ބާރު ފުލުހުންނަށް ދިނުން ހިމެނެ އެވެ.
