ބިދޭސީންގެ ފީ މި މަހުގެ ނިޔަލަށް ނުދައްކާ ކުންފުނިތައް ސަސްޕެންޑް ކުރާނެ ކަމަށް ހޯމް މިނިސްޓްރީން ހާމަކޮށްފި އެވެ.
ހޯމް މިނިސްޓްރީން ބުނެފައިވާ ގޮތުގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމަނާ 100،000 ރުފިޔާއަށްވުރެ އިތުރުވާ ކަމަށާއި ވަޒީފާދޭ ފަރާތްތަކުން މި މަހުގެ 12 ވަނަ ދުވަހުގެ ކުރިން ފައިސާ ދައްކާ ހަލާސްކުރުމަށް އަންގާފައިވާ ކަމަށެވެ.
އެފައިސާ ދައުލަތަށް ދެއްކުމުގެ އިތުރު ފުރުސަތެއްގެ ގޮތުގައި ހޯމް މިނިސްޓްރީއިން މިމަހުގެ 31 ވަނަ ދުވަހުގެ ނިޔަލަށް މުއްދަތު އިތުރުކޮށްފައިވާއިރު، މިމަސް ނިމުމުގެ ކުރިން ފައިސާ ދައްކާފައިނުވާނަމަ، އެ ފައިސާ ދައުލަތަށް ދައްކާ ހަލާސް ކުރުމަށް މިނިސްޓްރީއިން ވަނީ އެދިފައެވެ.
މީގެއިތުރުން މިމުއްދަތުގައި ފައިސާ ދައްކާފައިނުވާ ވަޒީފާދޭ ފަރާތްތަކަށް 1 ސެޕްޓެމްބަރު ވަނަ ދުވަހުން ފެށިގެން ދިވެހިރާއްޖޭގައި ބިދޭސީން ވަޒީފާ އަދާކުރުމާބެހޭ ގަވާއިދުގެ ދަށުން އެކްސްޕެޓް ސިސްޓަމްއިން ސަސްޕެންޑް ކުރެވި ސިސްޓަމް މެދުވެރިކޮށް ދެމުން ގެންދާ ހިދުމަތްތައް މެދުކަނޑާލެވޭނެ ކަމަށް ވެސް މިނިސްޓްރީން ވަނީ ބުނެފައެވެ.
