ރަސްމީ ދަތުރުފުޅެއްގައި ރައްޔިތުންގެ މަޖިލިހުގެ ރައީސް، އަބްދުއްރަހީމް އަބްދުﷲ ޗައިނާއަށް ފުރައިވަޑައިގަންނަވައިފިއެވެ.
އެމަނިކުފާނު ރޭ ޗައިނާއަށް ފުރައިވަޑައިގަތީ ޗައިނާގައި ބާއްވާ ކުރިއަރަމުން އަންނަ ޤައުމުތަކުގެ ޤާނޫނު ހަދާ މަޖިލިސްތަކުގެ ސެމިނާއެއްގައި ބައިވެރިވެވަޑައިތަމަށްޓަކައެވެ.
މަޖިލިހުގެ ރައީސްގެ މި ދަތުރުފުޅަނީ އަންނަ ހުކުރު ދުވަހާއި ހަމައަށް ކުރައްވާ ފަސް ދުވަހުގެ ދަތުރުފުޅެކެވެ.
އިންޓަ-ޕާލިމަންޓަރީ ޔޫނިއަނާއި ޗައިނާގެ ސަރުކާރު ގުޅިގެން ބާއްވާ މި ސެމިނާގެ މަޢުޟޫއެއްގެ ގޮތުގައި ކަނޑައަޅުއްވައިފައިވަނީ، ދެމެހެއްޓެނެވި ތަރައްގީގެ ލަނޑުދަނޑިތަކެވެ.
މި ދަތުރުފުޅުގައި އަބްދުއްރަހީމް އަރިހުގައި ވެރިކަންކުރާ ޕީއެންސީގެ ޕާލިމަންޓަރީ ގުރޫޕުގެ ތިން ޑެޕިއުޓީ ލީޑަރުން ބައިވެރިވެވަޑައިގަންނަވައެވެ. .
އެ ބޭފުޅުންގެ އިތުރަށް މަޖިލީހުގެ ރައީސްގެ ބިއުރޯ ޗީފު ވިލިމާލޭ ދާއިރާގެ ކުރީގެ މަޖިލިސް މެންބަރު މުހައްމަދު ނިހާން ހުސައިން މަނިކުވެސް އެ ދަތުރުފުޅުގައި އަބްދުއްރަހީމްގެ އަރިހުގައި ވަޑައިގަންނަވައެވެ.