މޫސުން ގޯސްވެ ވިއްސާރަވުމުގެ ސަބަބުން ވަގުތީ ހިޔާވެހިކަން ފޯރުކޮށްދިން އާއިލާތަކުގެ ތެރެއިން މިހާރު ވަގުތީ ހިޔާގައި ތިބީ ދެއާއިލާއެއް ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ހަސަން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ހިސާން ވިދާޅުވީ ހުސްވި ހަފްތާގައި ރާއްޖެއަށް ކުރި ވިއްސާރައިގައި ދިރިނޫޅެވޭ ވަރަށް ގެއްލުންވި 5 ގޭބިސީއަކަށް އެންޑީއެމްއޭ އިން ވަގުތީ އެހީތެރިކަން ފޯރުކޮށްދީފައިވާ ކަމަށާއި މިހާރު އެތަނުގައި އުޅެމުން އަންނަނީ 2 ގެބީސީއެއްގެ 10 މީހުން ކަމަށެވެ.
ހިސާން އިތުރަށް ވިދާޅުވީ އާންމު ހާލަތަށް އައުމުން އެމީހުން އާންމު ދިރިއުޅުމަށް ރުޖޫއަ ކުރެވޭނެ ކަމަށެވެ.
ވިއްސާރައިގެ ސަބަބުން ލިބުނު ގެއްލުންތައް ދެނެގަތުމަށް އެންޑީއެމްއޭއިން މިހާރު ދަނީ އެސެސްމަންޓު ހެދުމުގެ މަސައްކަތް ކުރަމުންނެވެ.
