ޓެކްސް އަށް މަކަރު ހަދާ ކަމަށް ބުނެ ކްޓަރީ ބޭސް އިމްޕޯޓްކޮށް ވިއްކާ “މައި ކެމިސްޓް” ގެ ވެރިޔާ ހުސެއިން އިރުފާންގެ މައްޗަށް ދައުވާ ކުރަން ޕްރޮސިކިއުޓާ ޖެނެރަލް (ޕީޖީ)ގެ އޮފީހަށް ހުށަހަޅައިފިއެވެ.
މިރާ އިން އާއްމުކޮށްފައިވާ ބަޔާނެއްގައި ބުނެފައި ވަނީ ގަސްދުގައި ޓެކްސް އަށް މަކަރު ހަދާ ކަމަށް ތުހުމަތު ކުރެވޭތީ އިރުފާންގެ މައްޗަށް ޖިނާއީ ތަހުގީގެއް ހިންގައިފާ ކަމަށެވެ. އަދި އެތަހުގީގުން ސާފުވާ ގޮތުގައި އިރުފާން އެ ކަން ކޮށްފައިވަނީ ގަސްތުގައި ޓެކްސް ދެއްކުމުން އެއްކިބާވުމުގެ ނިޔަތުގައި ކަމަށް ބެލެވޭތީ މީރާއިން އެކަން ތަހުގީގުކޮށްފައިވާ ކަމަށެވެ.
އެގޮތުން 2018 އަދި 2019 އަށް ހުށަހަޅާފައިވާ ބީޕީޓީ ބަޔާންތަކާއި 2020 އަށް ހުށަހަޅާފައިވާ އިންކަމް ޓެކްސް ބަޔާނުގައި ދޮގު މައުލޫމާތު ހިމަނާފައިވާ ކަމަށް ތުހުމަތު ކުރެވޭ ކަމަށާއި އަހަރަކު 53 މިލިއަން ރުފިޔާގެ އާމްދަނީއެއް އެވްރެޖްކޮށް މީރާއަށް ރިޕޯޓުކޮށްފައިނުވާ ކަމަށެވެ. އަދި މީރާއިން ކުރިއަށްގެންދިޔަ އޮޑިޓްތަކުގައި 12 މިލިއަނަށްވުރެ ގިނަ ރުފިޔާ އިތުރަށް ދައްކަންޖެހޭ ޓެކުހުގެ ގޮތުގައި ކަނޑައަޅާ އެ ޓެކްސް މީރާއަށް ދައްކަން އެ ފަރާތަށް އަންގާފައިވާ ކަމަށް މިރާއިން ބުނެފައިވެ އެވެ.
ޓެކްސް ނެގުމާ ބެހޭ އިދާރީ ގާނޫނުގެ 64 ވަނަ މާއްދާގައި ބަޔާންކޮށްފައިވާ ގޮތުގައި މީރާއަށް ދައްކަންޖެހޭ ޓެކްސް ދެއްކުމަށް އެނގިހުރެ ގަސްތުގައި އެއްކިބާވުމުގެ ނިޔަތުގައި އެއްވެސް ކަމެއް ކުރުމަކީ ކުށެއް ކަމަށާއި އެފަދަ ކުށެއް ކުރުމަށް ޓެކްސް ދައްކަންޖެހޭ މީހަކަށް އެހީތެރިވެދިނުމުގެ ނިޔަތުގައި އެއްވެސް ކަމެއް ކުރުމަކީ ވެސް ކުށެކެވެ.
