ތައިލެންޑުގެ އާ ބޮޑުވަޒީރު ޕައެޓޮންޓާން ޝިނަވަޓްރާ އަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ.
ރައީސް ޑރ. މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ އެކަމަނާގެ ދައުރުގައި، ތައިލެންޑަށް އުޖަލާ މުސްތަގުބަލެއް އެބަ އޮތް ކަމަށާއި ކުރިއަށް އޮތްތަނުގައި ރާއްޖެ އާއި ތައިލެންޑުގެ ގައުމުގެ ގުޅުން ވަރުގަދަކޮށް، ގުޅިގެން މަސައްކަތްކުރެއްވުމަށް އުއްމީދު ކުރައްވާ ކަމަށެވެ.
ތައިލެންޑްގެ ދުސްތޫރީ ކޯޓުން ކުރި އަމުރަކާއި ގުޅިގެން އެގައުމުގެ ކުރީގެ ބޮޑު ވަޒީރު މަގާމުން ދުރުކުރުމުން ޕައެޓޮންޓާން ބޮޑުވަޒީރު ކަމުގެ މަގާމަށް އައިސްފައިވާއިރު، މިއީ ފާއިތުވެ 20 އަކަށް އަހަރުގެ ތެރޭގައި ޝިނަވަޓްރާ ދަރިކޮޅުން ވެރިކަމަށް ވަޑައިގެންނެވި 4 ވަނަ ބޮޑުވަޒީރެވެ.
ތައިލެންޑްގެ ބޮޑުވަޒީރު ކަމަށް އައްޔަންކޮށްފައިވާ ޕައެޓޮންޓާން ޝިނަވަޓްރާ އަކީ އުމުރުން 37 އަހަރުގެ އަދި އެގައުމުގެ އެންމެ ހަގު އަދި ދެވަނަ އަންހެން ބޮޑު ވަޒީރެވެ.
ޕައެޓޮންޓާން އަށް ބޮޑުވަޒީރުކަން ބޮޑުވަޒީރުކަން ލިބިވަޑައިގެންނެވި ކަމުގައިވީ ނަމަވެސް މަޝްރަހު ދިރާސާ ކުރައްވާ ފަރާތްތަކުން ބުނާ ގޮތުގައި މިދުވަސްވަރަކީ ދާހިލީ މައްސަލަތަކާއި އެގައުމުގެ އަސްކަރިއްޔާގެ ނުފޫޒާއި ބާރު ސިޔާސީ ކަންކަމުގެ ތެރޭގައި އޮންނަ މިންވަރާއި ވެރިކަމުގެ ތެރެއަށް ކޯޓުތަކުން ނުފޫޒު ފޯރުވާ މިންވަރަށް ބަލާއިރު ދަތިއުނދަގޫވަގުތެއް ކަމަށެވެ.
އެގޮތުން އެގައުމުގައި އެންމެފަހު ބޮޑުވަޒީރުގެ އިތުރުން، މިހާރު އައްޔަން ކުރައްވާފައިވާ ބޮޑު ވަޒީރުގެ ބައްޕާފުޅު ތަކްޝިން ޝިނަވަޓްރާ ހިމެނިވަޑައިގަންވާ ގޮތަށް މީގެ ކުރިން ވެރިކަން ކުރެއްވި 3 ބޮޑުވަޒީރުން ވެރިކަމުން ދުރުކުރީ ގެނައި އަސްކަރީ ބައާވާތާއި ކޯޓުގެ އަމުރުތަކުންނެވެ.
