ކަނޑު އަޑީގައި މީރުފެން އުފައްދާ ނިޒާމު ޤާއިމުކުރުމާ ބެހޭގޮތުން ދިރާސާއެއް ހެދުމަށް މާލޭ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިޔުއެސްސީ)އާއި ނޯވޭގެ ކުންފުންޏެއްކަމަށްވާ ފްލޯޝަންއާއެކު ފަހުމުނާމާގައި ސޮއިކޮށްފިއެވެ.
އެމްޑަބްލިޔުއެސްސީގެ ފަރާތުން ފަހުމުނާމާގައި ސޮއިކުރެއްވީ އެމްޑަބްލިޔުއެސްސީގެ މެނޭޖިން ޑިރެކްޓަރ އަބްދުލް މަތީން މުޙައްމަދެވެ. އަދި ފްލޯޝަންގެ ފަރާތުން ފަހުމުނާމާގައި ސޮއިކުރެއްވީ އަލެގްޒަންޑަރ ފުލެސަންގއެވެ.
މި ރަސްމިއްޔާތު ޝަރަފުވެރިކޮށްދެއްވުމުގެ ގޮތުން ވާހަކަފުޅު ދައްކަވަމުން ޢަބްދުލް މަތީން މުޙައްމަދު ވިދާޅުވީ މާލެ ސަރަހައްދަށް ބޭނުންވާ މީރު ފެން އުފެންދުމުގެ ނިޒާމެއް ކަނޑު އަޑީގައި ޤާއިމްކުރެވުމާ ގުޅިގެން ގިނަ ފައިދާތަކެއް ރާއްޖެއަށް ކުރާނެކަމަށެވެ. އެގޮތުން ފެން ޕްލާންޓް ޤާއިމްކުރުމަށް ބިމެއް ބޭނުން ނުވުމުގެ އިތުރުން މިހާރަށް ވުރެ ޚަރަދު ކުޑަކޮށް، ކަނޑު އަޑީގައި ފެން އުފައްދާ ނިޒާމެއް އޮޕަރޭޓުކުރެވިދާނެކަން މަތީން ފާހަގަކުރެއްވިއެވެ.
އެމް.ޑަބްލިޔު.އެސް.ސީއާއި ފްލޯޝަން ގުޅިގެން ކުރިއަށް ގެންދިޔުމަށް ހަމަޖެހިފައިވާ މި ދިރާސާގައި ކަނޑު އަޑީގައި އާރ.އޯ ޑީސެލިނޭޝަން ސިސްޓަމް ޤާއިމްކުރުމަށް ބޭނުންވާ ފަންނީ މަޢުލޫމާތު ހޯދުމާއި، އެ ކަމަށް ބޭނުންވާ ކަނޑު އަޑީގެ ދިރާސާތަކާއި، ތިމާވެއްޓަށް އަސަރުކުރާނެ މިންވަރު ދެނެގަތުމުގެ އިތުރުން، މި ގޮތަށް ފެންއުފެއްދުމާ ގުޅޭ މާލީ ހިސާބުތައް ތައްޔާރުކުރުމަށް ވަނީ ހަމަޖެހިފައެވެ. މީގެ އިތުރުން ރާއްޖޭގެ ދިޔަވަރާއި އޮޔާއި ރާޅަށް ބަލައި، އެންމެ ޚަރަދު ކުޑަ، ތިމާވެއްޓާ ރައްޓެހި ގޮތަކަށް ރާއްޖޭގައި ފެން އުފައްދާ ނިޒާމެއް ޤާއިމްކުރެވޭނީ ކިހިނެއްތޯ ބެލުން ވެސް އެ ދިރާސާގައި ހިމެނެއެވެ.
ފްލޯޝަން ކުންފުންޏަކީ މީރު ފެން އުފެއްދުމުގެ ނިޒާމުތައް ކަނޑު އަޑީގައި ޤާއިމްކޮށްގެން ފެން އުފެއްދުމުގައި ތަޖުރިބާ ލިބިފައިވާ ނޯވޭގެ ކުންފުންޏެކެވެ.
