އިނގިރޭސިވިލާތުން ރާއްޖެއަށް އާ ސަފީރެއް ކަނޑައަޅުއްވައިފިއެވެ.
އެ ގައުމުން ރާއްޖެއަށް ކަނޑައެޅުއްވި އާ ސަފީރަކީ ނިކް ލޯއެވެ. ނިކް ސަފީރުކަމުގެ މަގާމުގެ މަސްއޫލިއްޔަތު އަދާކުރައްވަން ފައްޓަވާނީ އަންނަ އަހަރުގެ ޖަނަވަރީ މަހުން ފެށިގެންނެވެ.
ނިކްއަކީ 2010 ވަނަ އަހަރާއި 2014 ވަނަ އަހަރާ ދެމެދު އިނގިރޭސިވިލާތުން ބަންގްލަދޭޝަށް ކަނޑައެޅުއްވާފައި ހުންނެވި ޑެޕިއުޓީ ހައި ކޮމިޝަނަރ ވެސްމެއެވެ. ހަމައެހެންމެ ނިކް ވަނީ މޮރޮކޯ، ޗިލީ، ބްރެޒިލް، އަލްޖީރިއާ، ޗައިނާ އަދި އިންޑިއާގައި ވެސް މަސައްކަތްކުރައްވާފައިކަން ފާހަގަކޮށްލެވެއެވެ.
މީގެ އިތުރުން ފޮރިން އެންޑް ކޮމަންވެލްތު އޮފީހުގެ ކްރައިސިސް މެނޭޖްމަންޓް ޑިޕާޓްމަންޓްގެ ޑެޕިއުޓީ ހެޑްގެ މަގާމު ވެސް ނިކް އަދާކުރައްވާފައިވެއެވެ.
