ސައޫދީ އަރަބިއްޔާގެ މައްކާގެ ޙަރަމްފުޅުގެ ފަތުވާ ކޮމިޓީގެ މެންބަރު ޕްރޮފެސަރ ޑރ.ޙަމްދާން އައްސުލަމީ އަންނަ ހުކުރު ދުވަހު އިސްލާމީ މަރުކަޒުގައި އިމާމުވެ ހުކުރު ނަމާދުކޮށް، ޚުތުބާ ދެއްވާނެ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ
ވަޒީރު ވިދާޅުވީ އިސްލާމީ މަރުކަޒުގައި އޭނާ ޚުތުބާ ދެއްވާނީ އަރަބި ބަހުން ކަމަށާއި ޚުޠުބާގެ ލައިވް ދިވެހި ތަރުޖަމާ ޓީވީތަކުން ބްރޯޑްކާސްޓް ކޮށްދޭނެ ކަމަށެވެ.
މީގެ އިތުރުން އިސްލާމީ މަރުކަޒުގައި އެންމެ ފުރަތަމަ ޢަރަބި ބަހުން ޚުޠުބާއެއް ދެއްވާފައިވަނީ މަރުކަޒު ހުޅުވުމުގެ ރަސްމިއްޔާތުގަ މިޞްރުގެ ޝައިޚުލްއަޒްހަރު ފަޟީލަތުއްޝައިޚު ޖާދަލްޙައްޤު ޢަލީ ޖާދަލްޙައްޤު ކަމަށާއި އެރަސްމިއްޔާތުގައި މައްކާގެ ޙަރަމްފުޅުގެ އިމާމު ފަޟީލަތުއްޝައިޚު ސުބައްޔިލް ވެސް ބައިވެރިވެވަޑައިގެންނެވި ކަމަށް ވަޒީރު ވިދާޅުވި އެވެ.
މިއަހަރުގެ ނޮވެމްބަރު 11 އަށް އިސްލާމީ މަރުކަޒު ހުޅުވިތާ 40 އަހަރު ފުރޭކަން ފާހަގަ ކުރައްވާ ވަޒީރު ވިދާޅުވީ އެ މުނާސަބަތާ ގުޅިގެން ޚާއްޞަ ޙަފްލާއެއް ބާއްވަން ރައީސް ޑރ މުއިއްޒު އިރުޝާދު ދެއްވާފައިވާ ކަމަށެވެ.
