މި އަހަރު ތެރޭގައި އައިޖީއެމްއެޗްގައި އިތުރު 70 އެނދު ބެހެއްޓުމުގެ މަސައްކަތް ސަރުކާރުން ކުރަމުން އަންނަކަމަށް ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ޢަބްދުލް ރައްޒާޤު ހަލީމް ވިދާޅުވެއްޖެއެވެ.
އެ ބޭފުޅާ މި ފަދައިން ވިދާޅުވީ ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި، ގްރޭޓަރ މާލެ އޭރިއާގެ ސަރުކާރު ހޮސްޕިޓަލުތަކަށް ދިމާވެފައިވާ ގޮންޖެހުންތައް ހިއްސާކުރެއްވުމަށް ދެއްކެވި ވާހަކަފުޅުގެތެރެއިންނެވެ.
އެ ކޮމިޓީގައި ވާހަކަފުޅު ދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ މަގާމު ވެސް ފުރުއްވާ ޢަބްދުލް ރައްޒާޤު ވިދާޅުވީ އެނދުގެ ދަތިކަން ހުރުމުގެ ސަބަބުން އިމަރޖެންސީ ރޫމުގައި ވެސް ބަލި މީހުން އެދުމަތިކޮށްގެން ފަރުވާދޭން ޖެހޭ ހާލަތްތައް އަންނަކަމަށެވެ. އަދި އެ ކަންކަމަށް ހައްލު ހޯދުމަށް ސަރުކާރުން ކުރަމުން އަންނަ ކަންކަމާ ގުޅޭގޮތުން ވެސް އެ ބޭފުޅާ ވަނީ ވާހަކަފުޅު ދައްކަވާފައެވެ.
މާލެ ސަރަހައްދުގެ ހޮސްޕިޓަލުތަކަށް ދިމާވެފައިވާ ގޮންޖެހުންތައް ހައްލުކުރުމަށް ސަރުކާރުން ކުރަމުން އަންނަ ބައެއް ކަންކަން:
- މި އަހަރު ތެރޭގައި އައިޖީއެމްއެޗްގައި އިތުރު 70 އެނދު ބެހެއްޓުން
- އަންނަ އަހަރުގެ ކުރީ ކޮޅު ވިލިމާލޭގައި 1000 އެނދުގެ ހޮސްޕިޓަލެއް އެޅުމުގެ މަސައްކަތް ފެށުން
- އައިޖީއެމްއެޗް އަޕްގްރޭޑް ކުރުމުގެ މަޝްރޫޢު
- އައިޖީއެމްއެޗް ހޮސްޕިޓަލު ހުރި ބިމުގައި ކެންސަރ ހޮސްޕިޓަލެއް ޤާއިމުކުރުން
- ހުޅުމާލެ ހޮސްޕިޓަލް ހުންނަ ގޯތި ތެރޭގައި އިތުރު އިމާރާތްތައް އެޅުން
1995 ވަނަ އަހަރު އައިޖީއެމްއެޗްގައި ހުރީ 186 އެނދެވެ. މި އަހަރުގެ މިހާތަނަށް އައި އިރު މާލެ، ހުޅުމާލެ އަދި ވިލިމާލެ ހޮސްޕިޓަލް ހިމެނޭހެން ހުރީ އެންމެ 316 އެނދެވެ. މިއީ އިމަރޖެންސީއާއި އައިސީޔޫގައި ބޭނުންކުރާ އެނދުގެ އިތުރަށް ބަލި މީހުން ބައިތިއްބަން ބޭނުންކުރާ އެނދުތަކެވެ.
1995 ވަނަ އަހަރުން ފެށިގެން މާލެ ސަރަހައްދުގެ އާބާދީއަށް ބޮޑު ބަދަލެއް އައިސްފައިވާކަމަށާއި ނަމަވެސް އާބާދީ އިތުރުވި މިންވަރާ އަޅާބަލާ އިރު އެކަށީގެންވާ އަދަދަކަށް އެނދު އިތުރުކުރެވިފައި ނުވާކަމުގެ ކަންބޮޑުވުން ޢަބްދުލް ރައްޒާޤު ވަނީ ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި ފާޅުކުރައްވާފައެވެ.
