އެމްޓީސީސީގެ ޗީފް އެގްޒެކެޓިވް އޮފިސަރު (ސީއީއޯ) އަދި މެނޭޖިން ޑިރެކްޓަރު (އެމްޑީ) ގެ މަގާމުން އަބްދުﷲ ޒިޔާދު ވަކި ކޮށްފި އެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑުން މިއަދު އާއްމު ކުރި ނޫސް ބަޔާނެއްގައި އެމަގާމުން ޒިޔާދު ވަކި ކުރުމަށްފަހު އެމްޓީސީސީގެ ޗީފް އެގްޒެކެޓިވް އޮފިސަރު (ސީއީއޯ) އަދި މެނޭޖިން ޑިރެކްޓަރު (އެމްޑީ) ގެ މަގާމަށް ކުރީގެ ޑެޕިއުޓީ ކޮމިޝަނަރު އަހުމަދު ސައުދީ ވަނީ ހަމަޖައްސައިފަ އެވެ. އެމްޓީސީސީގެ ސީއީއޯގެ މަގާމުން ވަކި ކުރުމަށްފަހު އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރުގެ މަގާމަށް އޭނާ ވަނީ އައްޔަން ކޮށްފަ އެވެ.
އެމްޓީސީސީގެ ސީއީއޯގެ މަގާމަށް އައްޔަން ކޮށްފައިވާ ސައުދީ އަކީ ރައީސް އަބްދުﷲ ޔާމީންގެ ވެރިކަމުގައި ޑެޕިއުޓީ ކޮމިޝަނަރު އޮފް ޕޮލިސްގެ މަގާމު އަދި 2018 ވަނަ އަހަރު ފުލުހުންގެ އިދާރާ ހިންގުމާ ހަވާލުވެ ހުންނެވި ބޭފުޅެކެވެ.
ސައުދީ އެންމެ ފަހުން މާލޭ ސިޓީ ކައުންސިލް ގައި ހުންނަވާފައިވާ އިރު، ސައުދީ ވަނީ ރައީސް ޑރ. މުހައްމަދު މުއިއްޒު މާލެ ސިޓީގެ މޭޔަރަކަށް ހުންނެވިއިރު މާލޭގެ މަގުމަތީގެ އެކިއެކި ކަންކަން ބަލަހައްޓަން އުފެއްދި “މަގުފާރަވެރިން” ގެ ޔުނިޓްގެ އެންމެ އިސްވެރިޔާގެ މަގާމް ވެސް ފުރުއްވާފަ އެވެ.
